Abogado Duijneveld a splica cu un so di 90 trahador ta suficiente pa pidi bancarota pa STA
Cu sosten di un y tur:
ORANJESTAD (AAN) – Den entrevista cu Abogado mr. Edwin Duijneveld, tocante e situacion cu a presenta cerca e trahadornan di SATA, el a splica con un proceso di bancarota ta, y kico por tin den e caso aki. Duijneveld a splica cu pa declara un compania den bancarota logicamente e tin su proceso. Pa pidi esaki un hende mester a stop di paga ora e tin debe y e mester tin mas cu un acreedor. E mes ta representa mas cu 90 di e trahadornan di SATA, y ta mas cu suficiente. Un ta haci e peticion pa bancarota y 89 ta sostene esaki. E ora ey e caso ta bay Corte, cual ta yama e compania debedo aden, cual ta defende su mes y e ora ey Huez ta declara e bancarota y un curator ta worde nombra pa deal cu esaki.
Prome cos cu un curator ta haci ta termina e acuerdonan di trabao, e trahadornan por bay SVb pa nan cesantia, y tin di nan ta trahando entre mas cu 15 y 20 aña cu SATA, y nan lo haya un suma considerable di SVb, y esnan cu tin tiki tempo lo haya menos.
Pero como tin un persona cu ta dispuesto pa tuma e compania over e operacion lo por sigui, e ora ey esey ta den man di gobierno. Den un conversacion cu e abogado tabata tin cu Minister Otmar Oduber, el a bisa cu tanten cu e compania ta den deficit nan no por haya nada y e tin razon.
Pero si manera e worde declara bancarota, gobierno como accionista mayoritario di Aeropuerto por duna cierto ordonan.
