Boet halto pa esnan cu no cumpli cu loke ley ta stipula
Pensioen obligatorio pa trahadornan den sector priva
ORANJESTAD (AAN): Trahadornan den sector priva ya caba a ripara ora nan a haya nan salario luna pasa cu minimal un porciento di nan entrada bruto a worde reteni pa asina cuminsa traha riba nan pensioen. Banda di esaki e dunado di trabao tambe a contribui na e pensioen di su empleado cu minimal un porciento. Esaki ta desde prome di januari 2012 ora e “Landsverordening Algemeen Pensioen” a drenta na vigor. E ley aki ta stipula cu dunadornan di trabao den sector priva ta obliga pa percura cu nan empleadonan tin un areglo di pensioen adicional banda esun di AOV. Un di e puntonan di enfoke di Gabinete Mike Eman ta pa percura pa esnan cu tin un entrada bou haya algo extra pa despues ta financieramente miho para. Den e grupo aki tin hopi hende di edad cu ta completamente dependiente di nan entrada di AOV.
E suma aki den mayoria caso ta insuficiente pa por biba cu ne, door di cua hopi hende di edad sea mester traha of ta depende di ayudo di famia. Aunke cu ya pa añanan largo a studia e posibilidad pa bin cu un areglo di pensioen adicional, tabata Prome Minister Mike Eman cu a pone e tema aki riba agenda di e Dialogo Social.
Dia 27 di augustus 2010, ni un aña despues di a sinta como gobierno, dunadornan di trabao, empleadonan y gobierno a yega na e conclusion cu e pensioen adicional mester bin. Mas di un aña y hopi reunionnan despues e acuerdo di un pensioen general obligatorio a keda cla.
E ley mester a bin, pa asina den futuro tur hende por gosa di un behez sin problema financiero.
Den principio e ley ta masha simpel.
Dunadornan di trabao ta obliga pa bin cu un areglo di pensioen pa nan empleadonan. Nan mester retene e prima pa medio di nan administracion di salario. Dunadornan di trabao y empleadonan ta paga e prima necesario di cada un tres porciento.
Como areglo di transicion e aña aki ta paga minimal un porciento cada un y otro aña minimal dos porciento. Mas prima ta nifica mas pensioen, pero tin un limite legal na loke ta vrijstelling di prima di belasting. Normalmente ta dura 40 aña pa un hende por traha riba un pensioen completo.
Mayoria hende cu ta trahando awor no tin 40 aña mas pa traha. Specialmente pa nan e ley ta ofrece e posibilidad pa tin un extra pensioen door di paga mas na prima. Si ta asina cu un hende di 55 aña of mas no por traha riba un pensioen mas.
Pa nan a bin cu un areglo special. Nan mester paga mescos cu tur otro trahado prima di pensioen, pero ora nan yega nan edad di pensioen nan por haya un suma cu ta mas halto cu tur otro suma di prima hunto den un solo bes. Esaki door cu tin interes riba e placa.
E ley ta hopi cla y ta stipula cu dunadornan di trabao mester regla pensioen pa nan empleadonan, pero cu mester haci esaki den deliberacion cu nan y percura pa tur informacion encuanto e areglo di pensioen ta obtenibel.
Mester yega na un acuerdo cu cua fondo of compania di pensioen ta bay negosha. Cada empleado mester dicidi pa su mes of un cubrimento minimal ta suficiente of si kier paga mas prima pa haya extra cubrimento. Por pensa riba un pensioen extra den caso di AO (cu e empleado no por traha mas) of pa cubri den caso cu e empleado fayece, e viuda y huerfanonan.
Dunadornan di trabao cu ainda no tin un areglo di pensioen pa nan empleadonan mester haci esaki lihe.Nan tin te fin di mart pa regla nan asuntonan. Si nan no haci esaki, nan ta viola ley y nan por conta riba un boet cu por yega te 250 mil Florin.
Empleadonan cu ainda no tin un areglo di pensioen mester puntra nan dunador di trabao con ta para cu esaki. Nan interes finalmente ta grandi, pasobra aki ta trata di un futuro financieramente miho pa nan y mas di 30 mil otro empleado.
