Cobra un suma di pensioen mas halto un poco mas lat
Esaki ta Flexpensioen:
ORANJESTAD(AAN): Ora bo haci 60 aña bo por bay cu pensioen na Aruba y bo tin derecho riba un suma di placa den cuadro di AOV (Algemene Ouderdomsvoorziening). E placa aki no ta hopi y tin un cantidad grandi di hende cu por y kier sigui traha despues di nan 60 aña. Desde prome di januari 2012 tin un ley cu ta haci posibel cu por scoge pa pospone e pensioen di behes a cambio di un entrada mas halto despues di algun aña. Cu introduccion di Flex AOV y cu na mes momento ta drenta na vigor un ley di pensioen obligatorio, un deseo ardiente di AVP ta worde cumpli. Durante cu e tabata lider di oposicion e actual Prome Minister di Aruba Mike Eman pa añanan largo a pidi atencion pa e situacion penoso di entrada di e pensionadonan.
Mas ainda pasobra cu hopi no tin un entrada completo di AOV door cu nan no a biba henter nan bida na Aruba. Asina cu e gobierno actual a tuma rienda di pais Aruba fin di aña 2009 a cuminsa traha riba e leynan necesario pa trece cambio den e sistema di pensioen di AOV.
Edwin Jacobs, director di SVb ta splica un que otro di e flexpensioen. “E suma actual di ta Afl.1057 pa un hende su so y Afl.1780 pa pareha por lo general ta insuficiente pa por biba cu ne. Riba dje mayoria hende no tin un pensioen completo”. E suma di e pago ta basa principalmente riba e cantidad di añanan cu e pensionado a biba na Aruba di su 15 aña te cu su 60 aña.
“Esnan cu a biba den exterior sea pa estudio of cualkier otro motibo, ta haya menos na pensioen”, asina Jacobs a splica. “E miles di imigrantenan cu a bin biba den e ultimo decenianan na Aruba, tambe ta cay den e categoria aki”.
Sigur cu e ‘vergrijzing’ nos dilanti finansa publico no por hisa e suma di pensioen. Pa ofrece e hendenan toch un miho bida ora nan yega un edad mas halto, a desaroya e flex pensioen: esun cu kier traha un aña of mas despues di a yega edad di 60 aña por pospone cobramento di su pensioen y ta haya a cambio di esaki un pago mas halto di pensioen despues.
Por pospone esaki te cu 5 aña y ta haya un interes anual di 7%. Cu esaki por sera gran parti di un eventual buraco den e pago di AOV. E pago por crece te maximal Afl.1482 pa un hende su so y Afl.2497 pa un pareha.
Un extra bentaha ta cu 60 plussers no mester paga e prima di AOV. Cu introduccion di Flex AOV Gabinete Mike Eman ta duna un man tambe na e grupo di empleadonan di mas edad cu tin poco aña pa traha pa por tin bentaha maximo di e areglo colectivo nobo di pensioen.
