Consulado Dominicano na Aruba lo traha un busto na honor di Juan Pablo Duarte
Den e marco di Luna di e Patria:
E Consulado General di Republica Dominicana na Aruba, lo inicia dia 25 di Februari awor, e trahamento di un busto na honor di e Patricio Juan Pablo Duarte Diez, den e marco di un conhunto di actividad pa conmemora e di 168 aniversario di e proclamacion di e Independencia Nacional, hecho cu a sosode dia 27 di Februari di aña 1844. E actividad lo wordo encabeza pa e consul general na Aruba, Joseline Rosario de Rosa y ingeniero Luis Sifres, director di Oficina di Ingenieria y Supervision di Obranan di Estado (OISOE). E ceremonia lo conta cu asistencia di e figuranan principal di gobierno di Aruba, incluyendo Prome Minister mr. Mike Eman y Gobernador sr. Freddy Refunjol Lopez.
E ceremonia di e prome picazo pa laga formalmente inicia e construccion di e busto ta programa pa 11’ or di mainta den e Plaza cu ta hiba e nomber di e fundador di e nacion Dominicana, situa na Caya Leeuwenhoekstraat, skina di Hospitalstraat dilanti hospital bieu, na Oranjestad.
Consul Rosario de Rosa lo hiba e discurso central di e acto, y el a adelanta cu den su intervencion lo resalta e valornan patrio di e pueblo Dominicano “Y locual ta nifica e gesta historico cu a proporciona nos e libertad cu awendia nos ta disfruta, danki na e lucha di homber y muhernan, encabeza pa e tatanan di e patria Juan Pablo Duarte Diez, Matias Ramon Mella y Francisco del Rosario Sanchez”.
E funcionario a splica cu e plaza na honor di Duarte a wordo concebi cu e interes cu e Dominicanonan residente na Aruba por rindi honor na e memoria di e Fundador di e nacion.
E terenonan a wordo dona pa gobierno di Aruba dia 27 di Februari 2011, mientras cu e autorizacion pa inicia e construccion a wordo otorga dia 8 di Februari awor, segun e consul a splica.
“Nos ta hopi emociona pasobra esaki ta un logro hopi importante pa e Republica” Consul Rosario de Rosa a bisa, despues di a informa cu riba dia 25 mes pa 7’or di anochi, e Consulado General lo auspicia un presentacion folklorico y artistico riba Plaza Paseo Herencia, situa den Irausquin Boulevard # 382-A. Pa ambos actividad a wordo invita e integrantenan di e comunidad dominicano na Aruba.
