Contrato pa adkiri trucknan nobo ta nifica un “win-win situation” pa Serlimar
Director di Serlimar Richard Fingal:
ORANJESTAD (AAN) – Den Serlimar ta tumando lugar un cambio considerable, segun loke Matutino DIARIO por a compronde den entrevista cu e director di e compania, señor Richard Fingal, ken a splica con nan a yega na un sistema di huurkoop pa adkiri 12 truck nobo, cu ta pone e compania den un “win-win situation”. Ta conoci cu Serlimar a busca 12 truck nobo mas chikito pero mas eficiente y efectivo. Señor Fingal a señala cu prome cu nan a yega asina leu di bestel e trucknan nobo nan a pasa den un proceso di evaluacion, pasobra na prome instancia no tabata den plan pa cumpra trucknan nobo.
Pero mirando cu tin cantidad di keho, cu tur hende sa cu e trucknan di Serlimar ta bieu, gasta, y ineficiente, a yega na conclusion cu busca material nobo ta un necesidad urgente pa duna servicio continuo y di bon calidad na pueblo.
Despues di a haci un estudio calculando cuanto cas tin na Aruba, e rutanan e peso di average di e sushi cu e trucknan ta carga, y saliendo for di punto di bista di estudionan cu a wordo haci caba for di pasado na Serlimar, a conclui cu e trucknan cu tin aworaki ta ineficiente.
Uno, nan ta hopi grandi vooral pa cierto camindanan di Aruba. Dos, nan tin un capacidad di 25 cubic yards cu ni cu nan sali 80 bez pa lanta sushi nunca ta yega na e capacidad necesario. Nan ta rond di cincuenta pa sesenta porciento di e capacidad. Cu otro palabra, Serlimar tin trucknan mas costoso, cu mas peso, cu ta costa hopi mas den mantenimento y cu ta uza mas combustible.
FLOTA NOBO:
E flota nobo ta mas chikito. Señor Fingal a splica cu e flota aki ta bon pa recoge den 100 block pa siman, cu ta nifica 450 cas cada un, pues e kiermen cu nan por trata 45.000 cas pa siman.
“E ta un capacidad hopi grandi, pero nos ta planeando pa futuro”, señor Fingal a expresa.
Na cuminzamento tabata imposible pa cumpra e trucknan aki cash, debi na e situacion financiero malisimo di Serlimar, pero mester a reorganiza e aparato y haci mas eficiente. Aworaki e situacion di Serlimar ta stabil.
Director sr. Fingal a sigui splica cu a sigui conseho di algun departamento di gobierno y asina Serlimar a acerca cuatro compania cu cual nan a bin na un destaho publico. Un di e companianan aki a entrega un oferta oficial y evaluando e situacion, e factor tempo y locual a wordo inverti te aworaki pa mantencion di e trucknan bieu, teniendo cuenta cu e mal servicio cu y e kehonan cu tur dia ta drenta na Serlimar, nan a conclui cu mester haci, anto rapido.
“Nos a dicidi di acepta locual tin riba mesa pasobra esaki ta yuda nos gana tempo, pasobra tempo ta nifica pa nos un perdida di mas of menos cien mil florin pa loke nos no por afford mas”, señor Fingal a expresa.
El a sigui menciona cu e trucknan nobo tin un capacidad di 20 cubic yards, pues nan ta 5.8 porciento mas chikito cu esnan cu tin te awor, pero nan por ofrece un servicio mas lihe, mas efectivo y cu menos costo di mantenimento kiermen ta gasta menos tire, menos combustible, y den cada ruta nan ta yena.
Serlimar a cumpra nan bao sistema di huurkoop pa un periodo di cinco aña cu ta sali nan mas barata cu nan a scoge e mesun deal pero pa cumpra e mesun tipo di truck cu nos tur conoce.
Director Fingal ta considera e decision aki como un “win- win situation” pa e compania, garantizando un mehor servicio pa henter nos comunidad.
El a agrega cu e acuerdo di huurkoop aki di cinco aña ta duna e compania espacio pa dos opcion: uno ta duna continuidad na e contrato y e otro ta pa aki cinco aña reemplaza e trucknan y bay back den un destaho publico y asina keda garantiza un servicio constante cu material den bon condicion.
