Deseo grandi pa personal di DBB specialisa riba cierto materianan
Drs. Andy Lee:
ORANJESTAD(AAN): Despues di un carera den mundo Politico, drs. Andy Lee a dicidi cu e ta prefera pa sigui e area den cual el a studia p’e y pa cual e tin plannan grandi pa futuro. Despues di a tuma e decision aki, el a worde nombra como director di Dienst Buitenlandse Betrekking, caminda e director mr. Agustin Vrolijk tabata preparando pa bay cu pensioen.
Durante un celebracion diabierna ultimo caminda a recorda e trabao di mr. Agustin Vrolijk y a tuma despedida di dje, tambe a yama bon-bini na drs. Andy Lee, kende a bin ta haciendo e trabao aki caba pa mas cu un luna bou bista di mr. Agustin Vrolijk. Drs. Andy Lee den su prome comentario como director di e departamento a señala cu Aruba como un isla chikito mester bay atende cu henter mundo (grandi) eyfo.
Y mester busca e oportunidadnan pero tambe evalua e riesgonan cu tin, pero tambe nan mester yuda Prome Minister den crea y ehecuta maneho pa cu e paisnan di mundo. Di e manera aki ta contribui cu Aruba ta saca beneficio di mundo y evita riesgonan cu ta bini riba Aruba.
“Pa logra esaki, bo mester ta internamente bon organiza. Si bo kier bira un pais “berde”, mester percura cu internamente ta cumpli cu esaki. Y e parti aki ta masha importante pa cumpli cune prome cu e mensahe bay afo,” drs. Lee a duna di conoce.
El a splica cu den e poco dianan cu e tin na e departamento, el a constata e bon cooperacion cu ta haya di e Cuerpo di Embahador y diplomaticonan di Reino. Y e ta sigur di lo sigui haya nan ayudo den e aspecto politico, pero tambe e ayudo necesario for di Hulanda. Como director nobo drs Andy Lee tambe tin un vision pa e departamento. El a splica cu nan kier yega na profesionalisa e aparato y organiza e trabao.
Tin bon trahado na e departamento di DBB, cu tin bon conocemento, pero mester organiza y programa e trabao. Drs Andy Lee ta kere cu mester crea e oportunidad pa e hendenan aki profundisa riba cierto materianan. Y algun di e areanan aki ta di desaroyo economico y diplomacia economico.
Mester crea oportunidad cu e hendenan por haya mas conocemento y crea red. Riba tereno politico, mester bay tin un vigilancia mas mihor di e situacionnan rond. Esaki ta nifica cu e departamento di DBB mester worde reforsa un poco mas, pa profundisa riba cierto materianan, pa por asisti den tumamento di decision na nivel politico.
Drs. Andy Lee ta recorda cu el a studia politica internacional, y e ta un Sociologo, un componente fuerte den esaki ta metodologia cu el a haya chens di test tempo cu e tabata traha na Oficina di Estadistica. Y maneha un organizacion gubernamental, cual e lo bay haci tambe na DBB, aunke e materia ta diferente.
Y como director, ta e personal tin e conocemento cual e ta haci uzo di dje pa ora di tumamento di decision. Loke ta masha importante, segun drs. Lee, ta cu na e departamento e tin asistencia di personanan cu conocemento di hopi aña di trabao.
