Diabierna awor ta un dia clave den busca di solucion pa e sobrevivencia di e refineria di Aruba
Minister Mike de Meza ta splica:
ORANJESTAD (AAN) – DIARIO a entrevista Minister Mike de Meza, titular di Finanzanan, Empresanan Estatal y Energia, tocante e situacion na e momentonan aki di Valero, y kico por spera e siman aki, despues di e bishita gubernamental na Colombia, y cu un delegacion di Ecopetrol ta wordo spera pa dia 24 di Februari awor. E dignatario a bisa cu e situacion di e refineria ta uno sumamente preocupante. “Si bo tuma e ultimo cuartal di aña pasa y e lunanan di Januari y Februari awor, e pronosticonan ta mustra cu e crisis petrolero ta hopi mas grandi cu ken cu ta por a pensa un aña pasa. Esey ta pone e refineria di Aruba y Valero tambe, den un situacion hopi preocupante. Nan a bin ta perde hopi placa aña pasa, vooral e ultimo cuartal, y e aña aki e perdida ta sumamente grandi”, Minister de Meza a comenta.
Minister de Meza a subraya cu no solamente Valero pero tur corporacion rond mundo ta cerando nan refinerianan. Por a mira siman pasa cu e refineria di Sint Croix, esun mas grandi den Caribe, Sur y Centro America a cera su porta, loke ta mustra con dramatico e cambionan cu a tuma lugar den e mercado di petroleo ta.
“ E ta asina cu pa Valero e ta un situacion sumamente dificil, nan ta purbando tur manera pa haya un partner cu tin azeta, y Valero ta e corporacion independiente di mas grandi cu tin na Merca y esey ta nifica cu nan no tin nan mesun reservanan di petroleo, pero nan ta cumpre riba e mercado liber. Esey ta trece cune cu ora e mercado cambia e ta afecta bo dramaticamente”, e dignatario a remarca.
Minister de Meza a agrega cu aworaki e compania ta mirando con por sigui structuralmente, pa un termino mas largo, cu e refineria di Aruba, mientras tanto cu gobierno ta asumi su responsabilidad y ta participa den esaki conhuntamente cu Valero pa busca un partner ideal pa cu Aruba.
E titular a splica cu tin diferente opcion y manera ta conoci gobierno a sinta cu e gobierno di Colombia, su presidente y Ecopetrol y cu e Minister di Energia di Brasil y Petrobras, y tur dos compania ta biniendo Aruba.
Gobierno tabata tin diferente comunicacion cu Venezuela y nan ta wardando algun cita pa sinta eventualmente cu Presidente di Venezuela tambe y e Minister di Energia, buscando asina aki den e region cu ta e lugar mas factible tambe pa e tipo di refineria cu nos pais tin, y e tipo di crudo cu tin den e region pa haya un partner pa nos refineria.
“Gobierno ta bezig cu e esaki, pero tempo no ta di nos banda pasobra tur dia e perdidanan ta bira mas grandi, y nos ta trahando na un manera diligente y mas lihe posible, pa purba haya un solucion prome cu e situacion bira peor”, Minister Mike de Meza a expresa.
El a reitera cu diabierna awor 24 di Februari, tin un delegacion di ehecutivonan di Colombia y tambe di Ecopetrol cu ta e compania di Estado di Colombia, cu ta biniendo Aruba pa topa cu e Ehecutivonan di mas halto di Valero San Antonio hunto cu Ehecutivonan di Valero Aruba, conhuntamente cu Gas Unit di Hulanda y un di e companianan cu ta bay haci exploracion riba e posibilidadnan di gas den e profundidad di e awanan na Aruba, y hunto cu gobierno ta bay sinta na mesa, nan ta bay haya diferente presentacion, ta bay tin diferente discusion y lo presenta diferente cifranan pa e partnernan aki wak e pakete total pa yega na un acuerdo conhunto, pa e bienestar di nos refineria.
Podise Diabierna awor, personanan di e gobierno di Brasil y di Petrobras lo bin tambe, y si no, e grupo aki lo bin un siman despues y lo nos tin e mesun setting hunto cu Valero y cu tur otro participante, pa bay den e mesun sesion aki y na fin di dia wak con, conhuntamente, por haya un solucion pa e sobrevivencia di e refineria na Aruba.
