E mayor cantidad di sushedad laga despues di carnaval ta concentra riba Adrian Boulevard te cu dilanti Parlamento!
Señor Victor Franken ta yame “area di desastre”
ORANJESTAD (AAN) – Matutino DIARIO a haci un entrevista cu señor Victor Franken, ken ta forma parti di e team di limpieza riba ruta di carnaval. Señor Franken a splica cu tin cierto areanan, por ehemplo e ruta unda tin trailer a keda un poco sushi atras, pero mas tanto den e area di Adrian Lacle Boulevard bayendo pa Lagoen, te cu dilanti di Parlamento tur aña e situacion ta desastroso. E area aki ta rekeri di hopi trabao y señor Franken ta gradici cu e tin un bon team para su tras cu su dia siguiente na e parada grandi, no ta mustra cu carnaval a pasa eynan mes. Franken a duna di conoce, diadomingo anochi, cu e tabata trahando cu 18 persona pa habri e caminda y laga tur lugar completamente limpi. El a resalta cu tur hende ta disfruta hopi di e tribunanan, pero pabao y patras e ta keda masha sushi mes, y no ta facil pa haci e partinan aki limpi.
El a agrega cu e supportnan cu a wordo poni pa wanta e tentnan a bira un chaos. Loke a sosode ta cu nan a pone como 200 bari yena cu santo blanco, y hendenan a deposita sushi riba e santo blanco, y tabata masha dificil pa haci nan limpi.
Señor Franken a splica cu despues di e parada di mucha, nan a pone cuatro plug pa haci e barinan aki limpi y a tuma un dia completo pa nan logra esaki, y no tabata posible pa haci e trabao aki despues di e parada grandi di Diadomingo. Pesey e director di Serlimar a dicidi pa laga esaki pa Diamars.
Señor Franken a menciona cu aña pasa nan a yena tres truck completo, y nan mester a busca un truck extra, locual ta demasiado. Pa loke ta diadomingo cu a pasa nan a cuminza traha banda di 10’ or di anochi calculando cu lo termina dialuna mas of menos 6’ or di mainta cu nan lo a yega D.O.W.
Franken a reconoce cu unda tin trailer tin algun persona cu tog ta tene consideracion y ta haci limpieza pero e areanan di desastre, manera el a menciona prome, ta e ruta di Adrian Lacle Boulevard, y rond di e rotonde tin tanto sushedad cu segun sr. Victor Franken, esnan cu ta laga esaki atras no por tin Aruba na pecho.
Franken a subraya cu Serlimar a haci su maximo esfuerzo y ta pone barinan y e ambiente ta cuminza bunita, pero ora cu e hendenan ta consumi alcohol ta lubida cu e bari ta banda di nan y ta tira e boternan abao. E ta kere cu si e hendenan tin mas consideracion, nos por tin un Aruba mas limpi y un mehor mañan.
Señor Victor Franken a elogia e pueblo di San Nicolas, y ta kita sombre pa nan, pasobra nan a haci bon uso di e cahanan cu a yuda tremendamente. El a gradici gobierno pa e cahanan cu nan a pone cu den parada grandi tambe a yuda hopi.
