E software sismologico instala na DMA ta permiti pa detecta temblornan su locacion y magnitud na un manera hopi mas liher
ORANJESTAD(AAN): Marck Oduber, director di Departamento Meteorologico Aruba (DMA) durante presentacion di e software sismologico nobo a duna di conoce cu desde cu e departamento aki a worde institui, e tareanan cu tabata worde haci door di servicio meteorologico di Antiyas Hulandes a worde tuma over door di DMA.
Entre e tareanan aki tabata inclui parti di sismologico y awor ta asina leu cu a haci un upgrade completo riba e parti aki. A bin cu un software ultramoderno pa detecta temblornan den nos region y hasta rond di mundo, unda cu e detecccion tin biaha ta bin hopi mas liher cu ora otro instancia mande. Ta trata di un deteccion automatico y ta importante pa por ehempel Departamento di Calamidad pa haya e informacion ora un sismo tuma lugar y e forza worde tuma, specialmente sismonan den e area di Aruba.
Marck Oduber a splica cu tur empledo di DMA a worde getrain door di Paul Friberg di e compania ISTI, cual ta esun cu a bende e software y a ofrece e training riba sismologia, mientras cu algun empleado tambe a haya curso basico riba con e software ta traha.
Paul Friberg a splica cu e software aki ta uno cu nan a desaroya conhuntamente cu e US Geological Survey y tambe NOAA. E software aki ta yuda mehora e deteccion automatico di temblornan rond di Aruba.
Banda di duna e locacion automatico, e sistema aki ta manda e-mails pa e personanan concerni mustrando e locacion di e temblor, su magnitud y e sismogramanan cu a worde captura door di e sismografo na Aruba y otronan tambe.
