Esnan cu ta cobra pensioen di AOV no ta paga prima di AZV
Declaracion di oposicion no ta berdad
ORANJESTAD(AAN): Despues di Parlamentario Andin Bikker (PDR), Lider di MEP Evelyn Wever-Croes tambe a haya ta necesario pa duna informacion incorecto relaciona cu e prima di AZV di pensionadonan. Nan ta bisa cu “e pober pensionado mester paga nada menos cu 11.5% di su pensioen na AZV.” Esaki ta totalmente incorecto, pasobra e prima ey ta worde paga door di SVb y no ta worde kita for di e pensioen di AOV.
Director di SVb, Edwin Jacobs a bari den forma categorico e ponencia di ambos Parlamentario for di mesa y ta splica cu ora cu AZV a worde introduci door di Gobierno di AVP na 2001, berdad tabatin e peliger cu un situacion fastioso por a surgi pa e pensionadonan.
Como cu nan no tin doño di trabao, nan mes lo mester a paga e parti di prima di AZV di e doño di trabao “Pa e prome añanan a haci algun adaptacion den e ley. SVb a pone un toeslag mes halto cu e prima di AZV riba e suma di pensioen. Esaki ta worde kita back y entrega na SIAD pa AZV. Pues e pensionadonan ta haya e mesun suma di semper.”
E mesun areglo a ser introduci e tempo ey pa personanan cu ta haya pago den cuadro di e “Weduwen- en Wezenwet” (AWW). Den transcurso di añanan e areglo aki a keda prolonga cada biaha, pero a keda mantene su caracter temporal.
Riba e pregunta con despues di diesun aña esaki a keda regla, Jacobs ta splica cu aña pasa Landsverordeningen AOV y AWW a worde adapta. Articulo 7, lid 8 di AOV awor ta bisa: “Aan de pensioengerechtigde die premieplichtig is in de zin van de Landsverordening algemene ziektekostenverzekering wordt door de Bank (SVb) ten laste van het Ouderdomsfonds ter compensatie van de door hen verschuldigde premie een zodanige toeslag toegekend, dat het aan hen uitgekeerde pensioenbedrag gelijk is aan het bedrag waarop zij zonder de bedoelde premieplicht recht zouden hebben gehad.” Pues e areglo temporal di e toeslag riba e AOV y AWW a worde cambia den un areglo fiho.
“Esaki ta nifica cu e pensionado ta haya e suma cu e tin derecho riba dje completo y e prima di AZV ta core pa nos cuenta,” asina Jacobs a splica.
For di cifranan di SVb di aña pasa ta resulta cu nan a paga un suma di 18.331.474 Florin na SIAD pa e prima di AZV di pensionadonan. E placa aki ta procedente di e fondo di AOV y sigur no ta worde kita for di e suma di pensioen.
