Ex-Polis Robert Kock declara liber di tur acusacion

Publication: Saturday, 11 February 2012. Categoria: General,Policial

ORANJESTAD(AAN): Diahuebs huez a duna su veredicto den un caso contra ex agente policial Robert Kock. El a worde acusa di maltrato y falsificacion den su trabao como polis, riba 2 di September 2008. Ademas di esaki el a worde acusa di menaza un muher cu su arma di candela y forza e persona pa haci cierto actonan sexual cune na diferente occasion na 2009. E caso a worde trata dia 19 di Januari 2012, despues cu na varios occasion e caso a worde posponi, entre otro pa scucha algun testigo cu ta den exterior. Diahuebs huez a duna su veredicto, unda cu el a declara Kock liber di tur acusacion.
Den su splicacion di e veredicto huez a bisa cu despues cu el a evalua tur cos den e caso aki, e no ta haya suficientemente comproba cu Kock tabata tin e intencion di causa dolor of lesion na e persona cu e tabata aresta durante su trabao como polis riba 2 di September 2008.

Huez a indica cu Kock a splica cu ora cu e tabata bin riba e sospechoso, su intencion tabata pa gare na su garganta pa controla e situacion y door di esey su man por a dal e persona un tiki fuerte cerca di su nek.

Testigo K. a bisa cu el a wak Kock dal e sospechoso, pero e no a specifica ki tipo di golpi esaki tabata y unda e golpi a dal e sospechoso.

Huez a tene cuenta tambe cu e hecho cu K. kende tabata colega di Kock mes a declara cu na dado momento ora cu e sospechoso a duna indicacion di bay dal Kock, K. a saca pia y a dal e sospechoso den su cara.

Despues di esey K. y e sospechoso a cay riba vloer. Mirando cu e sospechoso a papia di solamente 1 mokete cu el a haya, huez a bisa cu por tin duda den ken a dal e e mokete. Pa loke ta e hecho cu supuestamente Kock intencionalmente a falsifica un asina yama rapport di mutacion, huez tampoco a haya esey comproba.

Huez den su splicacion di su decision a papia tambe di e muher cu a entrega e denuncia contra Kock di menaza y e obligacion di haci actonan sexual cu e no tabata desea. E denuncia tabata bisa cu Kock a forze pa haci cierto actonan cu e no tabata desea y el a haci esakinan door di miedo pa Kock.

Sinembargo durante tratamento di e caso, abogado di Kock Mr. Demis Illes a presenta un carta di e mesun muher.

E muher a manda un carta den cual el a skirbi cu el a duna un denuncia falso contra Kock, pasobra e tabata bao di presion di propietario femenino di un establecimento nocturno, pa haci un denuncia contra Kock.

Den un ‘chat log’ e muher kende tabata traha na e lugar, a bisa Kock cu e propietario di e lugar a forze pa entrega e denuncia, pa asina Kock como agente policial no por a molestia e lugar mas den su funcion como polis..

Mirando e carta firma pa e muher y e chat log, huez no a haya e prome declaracion y denuncia di e muher na polis confiable. Huez a haya cu no tabata tin suficiente prueba, pa haya Kock culpable di esaki.

Mirando tur esaki, huez a haya na e conclusion cu e tin cu declara Robert Kock liber di tur acusacion. Kock mes a declara na DIARIO, cu pronto e lo bin dilanti cu algun informacion preocupante pa loke ta funcionamento di Cuerpo Policial di Aruba.

Leave a Reply