Ex prome minister Emily de Jong-Elhage lo dirigi su mes na hende muhenan di Aruba
Riba dia internacional di Hende Muher
ORANJESTAD (AAN): Riba dia 8 di maart 2012, mundo henter lo celebra Dia Internacional di Hende Muhe y nos na Aruba sigur lo uni tambe pa tene nos propio evento espectacular riba e dia aki.
Manera Minister Michelle Hooyboer-Winklaar a informa durante un conferencia di prensa, Aruba tambe lo tin su workshop, unda cu diferente dama den region ta invita pa discuti, intercambia, informa y inspira nos damanan di Aruba.
E areanan mas relevante relaciona cu e asuntonan di hende muhe na Aruba ta: violencia contra hende muhe, liderazgo y participacion, otorgacion di poder economico, planificacion y presupuesto nacional y derecho humano.
E topiconan aki hunto cu otro topico cu ta afecta nos hende muhenan na Aruba, lo bin na remarca durante e evento aki.
Como un di e oradornan invita y sigur conoci pa hopi di nos aki na Aruba ta, e ex Prome Minister di Antias Hulandes, Emily de Jongh-Elhage, cu ta un miembro di e Council of Women World Leaders. Sigur no ta un figura desconoci p’e pueblo di Aruba, ya cu na varios ocasion el a bishita nos isla durante su funcion oficial. E ta conoci pa ta un dama ehemplar y cu semper ta percura pa haci lo maximo pa bienestar di su pais.
Council of Women World Leaders ta un red internacional di e hefenan di Gobierno femenino actual y den pasado cu tin como mision pa mobilisa e nivel di mas halto di e lidernan femenino globalmente p’e accionnan colectivo riba e asuntonan di importancia critico pa e hende muhenan y desaroyo igual.
Un otro orador cu sigur tin hopi pa comparti ta Beth Brooke, cu tin e funcion di Global Vice-Chair di Ernst & Young. Beth ta pasiona pa uza su posicion di liderazgo como un di e funcionarionan mas halto califica na Ernst & Young pa haci un diferencia den mundo.
E ta kere fuertemente cu liderazgo den siglo 21 no ta solamente tocante crea ganashi, pero tambe di haci un diferencia. E ta boga pa empodera e hende muhenan economicamente y e ta dirigi su mes na e audiencia di henter mundo tocante e importancia di e promocion di hende muhe den negoshi y sociedad.
Di e forma aki pueblo di Aruba y specialmente nos damanan, ta cera conoci cu e personanan clave cu sigur tin hopi pa comparti y ta cla pa brinda un tremendo evento na un y tur.
