Hospital a haya varios caso di Maltrato, intoxicacion y accidente di auto
Weekend di Carnaval
ORANJESTAD (AAN): Departamento di Emergencia di Dr. Horacio E. Oduber Hospital a trata durante e ultimo fin di siman di Carnaval 58 bastante pashent cu keho di maltrato, pashent cu a sufri di accidente di auto y tambe pashent cu intoxicacion di alcohol. E registracion pa e victimanan a cuminsa diabierna 18 di februari 2012 te cu dialuna 20 di februari 2012. Remarcabel ta e echo cu di e 7 victimanan di accidente di auto 5 ta ser femenino entre 20 aña pa 56 aña di cual 1 tabata bou di influencia di alcohol y 1 a ser admiti den Hospital. Di e 11 victimanan di maltrato, 5 tabata ser femenino entre 25 cu 55 aña di cual 1 tabata bou influencia di alcohol y 1 a ser admiti den Hospital. E otro 6 victimanan di maltrato tabata masculino entre 15 cu 50 aña di cual 3 tabata bou di influencia pero ningun a ser admiti den Hospital. Pa loke ta trata victimanan di intoxicacion 2 tabata femenino y 2 tabata masculino entre edad di 15 pa 20 aña na unda tur 4 a ser admiti den Hospital.
Un fin di siman bastante druk pa Departamento di Emergencia na unda cada trahado a pone tur nan empeño pa yuda tur pashent lo mas lihe posibel brindando e calidad di servicio cu un y tur merece.
