Ley di Bachelor-Master ta habri oportunidadnan nobo pa Universidad di Aruba
Rene Herdé
ORANJESTAD (AAN): E ley di structura academico nobo di Universidad di Aruba cu a worde aproba ayera den parlamento di Aruba (14-0 / 11 AVP, 1 MEP, 2 miembro independiente) ta e adoptacion di e structura cu ta resultado di e intento di paisnan rond di mundo pa crea mas cooperacion, mas synergia den nan estudionan y mas oportunidad pa desaroyo academico na mundo. E structura ta simpel pero nobo pa nos.
E ta worde usa na Merca, Canada y hopi pais Europeo pa hopi aña caba. E structura riba su mes no ta e esencia di e cambio importante aki. E bentaha grandi cu ta cu ta bira mas facil pa intercambia programanan di estudio y docentenan entre universidadnan, pasobra e programanan y nan nivel ta cuadra miho cu otro, contrario na e situacion cu cada pais tabata tin su propio structura, programa, cu diferencianan di nivel grandi.
Esaki tabata haci dificil pa reconoce e programa di studiantenan entre un pais y otro. E intercambio di profesornan tabata limita. Introduccion di e sistema “Bachelor-Master” (BaMa) ta cambia tur esaki.
E ta nifica pa studiantenan cu nan por cuminsa studia na un universidad y transpasa nan gradonan pa un otro universidad y worde reconoci sin perde tempo ni balor di nan estudio.
E obstaculo ta keda si e disponibilidad di universidadnan pa traha hunto. Nan mester kier reconoce y accepta e programa y gradonan di studiante. Pa facilita esaki a crea institucionnan (inter)nacional cu ta evalua e nivel di estudio di un universidad y ta bisa na ki nivel e ta na un otro universidad.
E introduccion di e structura di ‘BaMa’ ta un paso grandi den e direccion di mas cooperacion y mas oportunidad pa studiantenan por forma nan estudio pa e pas mas cu nan interes. Pa studiantenan den paisnan chikito manera Aruba en especial e ta habri oportunidadnan pa crea un programa cu ta segun interes di e studiante y tog no keda mas tanto posibel den presupuesto acceptabel di estudio.
UNIVERSIDAD DI ARUBA: Pa universidad di Aruba e structura di “BaMa” ta habri e posibilidad pa crea mas programa hunto cu otro universidadnan den nos region, na Merca y Europa, y asina trece mas docente specialisa cu un universidad chikito no por atrae.
Di e forma aki ta inrikese e programa academico y habri oportunidadnan pa propio docentenan tambe coy experiencia den exterio cu ta inrikese nan como profesionalnan tambe. Pa studiantenan e ta nifica cu nan por cuminsa nan estudio aki na Aruba y cu menos obstaculo cu den pasado, haya oportunidad pa haci parti di nan estudio na un otro universidad y asina haya mas experiencia y inrikese of amplia nan programa di estudio.
Universidad di Aruba semper tabata tin, for di su creasion na 1987, e intencion di habri mas oportunidad pa nos studiantenan di Aruba por studia mas cu loke e universidad mes ta ofrece. E cooperacion sinembargo a keda limita te awor.
E structura nobo di “BaMa” ta crea un oportunidad nobo, pa por ehempel sera lasonan di cooperacion cu universidadnan den region, cu Merca y Hulanda, Venezuela y Colombia, Trinidad y otronan, pa amplia e posibilidad pa studiantenan di nos isla chikito y pa studiantenan di otro paisnan bini aki.
E creasion di e oportunidadnan aki no ta djies “leuk” y costa placa! Den mundo academico y di trabao, ta un echo awendia cu no solamente kico Bo a studia y unda Bo a studia ta conta. Pero tambe Bo experiencia den diferente situacion di estudio, trabao y bida.
Cu e structura nobo di “BaMa” cu awe porfin a worde aproba despues di mucho hopi aña, Universidad di Aruba tin un instrumento mas pa crea mas oportunidad pa nos studiantenan! Nos ta desea nan exito den esaki!!
