Marado di barco mester a bula pero pickup si a bay awa na waf di Playa
ORANJESTAD (AAN): Na waf di Playa a sosode un accidente cu Danki Dios no tabata asina serio. E victima a bula pa scapa su bida. Aki ta trata di maradonan di barco cu tabata bezig marando e barco Katrin S.
Tabata tin cabuya mara na e pickup cu tabata bezig pero na dado momento e barco a haye den un maniobra dificil. E barco a habri back for di kade y esey a pone cu el a trek e pickup.
Den e trekmento aki e pickup a cuminsa bay linja recta den awa. E persona fam R tras di stuur a bula na tempo for di e pickup y asina evita cu el a bay awa hunto cu pickup.
E pickup a cuminsa sink bay te den fondo di lama. E victima marado di barco a keda herida levemente. El a haya algun golpi na un pia y ambulance a ser pidi pa dune un man.
A bay cune hospital pa tratamento medico. E maradonan di barco ta hendenan cu a traha hopi aña trahando na waf y ta cu pension. Awor nan tin basta tempo marando barco.
Dialuna cos a bay robez. Finalmente a caba di mara e barco y a pusha esaki cu tugboat mare na waf. Despues cu situacion a calma y barco tabata mara a logra baha den awa y mara e pickup y sake mesora for di fondo.
E mecaniconan riba waf a splica cu pa anochi mes nan lo start e pickup back. Ta un motor diesel cu por wanta un chapuzon asina.
