Mas cu cien tire benta den Cero Tijshi na Mahuma creando peligro cune!
Franklin Maduro ta relata:
ORANJESTAD (AAN) – Den entrevista cu señor Franklin Maduro, funcionario di Departamento di Medio Ambiente, ken ta traha cu Minister Benny Sevinger, a elabora riba un problema grandi cu tin, cu centenarnan di tire ta worde benta den mondi, of otro camindanan, pero menos den dump cu ta unda nan mester bay. Señor Maduro a expresa cu e Departamento tin for di aña pasa, haciendo henter Aruba limpi, y nan a haya banda di school di Washington mas cu doscien tire benta. Un cantidad similar di tire a worde haya na un parcela di Moko, y e pregunta cu señor Maduro tin, ta si e lugarnan cu ta drecha of bende tire no ta conciente di locual nan ta causando.
El a bisa cu enfasis cu esaki eigenlijk un crimen contra Pais Aruba. Den un recorido den Cero Tijshi, na Mahuma, a topa cu mas cu 100 tire benta den mondi, y e tin e pregunta kico ta e plan tras di e actitud aki?
Señor Franklin Maduro a splica cu si e hendenan aki ta cende e tirenan na candela, lo ocasiona cu cierto avionnan lo no por baha ni subi, simplemente pasobra tin mondi na candela. Pesey e kier concientiza e lugarnan cu ta traha cu tire pa nan ta conciente cu nan ta obliga di hiba e tirenan na dump, pasobra si nan ta sigui benta nan den mondi e departamento ta haya su mes obliga di saca hende di otro camindanan pa bin recoge e tirenan hibe dump, y asina e trabaonan di limpieza di Aruba no ta bay keda cla nunca.
Departamento di Medio Ambiente no tin un prueba cu por mustra di cual lugar e tirenan ta worde benta den mondi, pero tin un otro problema adicional y esaki ta cu tin awa den e tirenan cu sangura den dje.
E peligro den Cero Tijshi ta cu e ta hopi cerca di Aeropuerto y cu si e mondi cende na candela e huma lo no permiti pa avionnan subi of baha, y eyden a haya un cantidad grandi di tire benta den diferente parti di e mondi.
Señor Maduro a splica cu e lugarnan cu ta traha cu tire mester registra na Serlimar pa ora nan hiba tire den dump, pero nan tin cu paga un suma y e ta asumi cu nan ta tira nan den mondi pa no paga esaki.
