Mediador, Gerencia di Hospital y Sindicato ABV a sinta na mesa pa sigui negocia CAO pa tempo mas largo
ORANJESTAD (AAN) – Mediador señor Anselmo Pontilius a sinta na mesa, na Hospital dr. Horacio Oduber, cu Gerencia di HOH y sindicato ABV, tocante e Contrato Colectivo cu ta den negociacion pa un tempo largo caba. Den un entrevista cu DIARIO a realiza cu Mediador sr. Pontilius el a relata cu e partidonan na Hospital, Gerencia y Sindicato, a cuminza cu e combersacionnan desde October y November di 2011, y ya for di November nan a pidi Mediador pa interveni, loke no ta inusual den e caso aki. Sr. Anselmo Pontilius a comenta cu tin un discusion basta grandi pa trata di yega na un CAO pa un tempo mas largo posible, contrario na e ultimo añanan cu cada aña Gerencia y Sindicato a firma un contrato di un aña.
El a subraya cu tin motibonan su tras pasobra Hospital ta depende di sumanan basta grandi cu ta drenta via AZV, y AZV alavez ta depende di e presupuesto cu gobierno ta presenta na Parlamento pa su aprobacion, pero aworaki tur dos partido ta convenci cu mester yega na un contrato colectivo cu aworaki tin un proposicion di 30 luna (dos aña y mey) te hasta 36 luna (tres anja).
Tambe ta asina cu hospital ta haya entrada adicional di servicionan priva cu e ta duna. Kiermen tin cierto ingresonan ta drenta, pero tambe e gastonan den medicina ta enorme rond mundo y Aruba no ta e excepcion.
Ademas e gastonan di awa, coriente, condicionnan di trabao secundario, kiermen tin un suma grandi cu tur luna mester ta disponible y aparte di salario di trahadornan tin otro gastonan mensual cu ta inevitable.
Esey lo ta e discusion tambe den e siguiente dianan, pa tin un bista cla pa tur hende sa unda HOH ta aworaki, unda e ta bay y kico ta realizable pa exigi den un situacion manera esun di Hospital.
Mediador ta haciendo su esfuerzo desde November te Januari y e combersacion a sigui for di diaranzon di e siman aki, pa intermediacion cu e dos partidonan.
E ta spera cu pa diabierna awor tur dos partido por informa cu nan por ta asina leu di presente internamente y posiblemente di haya un acercamento.
Mediador Anselmo Pontilius a splica cu ora di negocia un contrato mas largo, no ta un componente so tin. Salario hopi biaha ta e punto principal, pero tambe tin beneficionan secundario cu e trahadornan ta demandando di nan sindicato y cu ta rekeri di hopi discusion, pa motibo cu yega na un acuerdo no ta tur cos: con ta bay pague y con lo sigui pague den futuro ta importante den un hospital, unda ta papia di como 800 trahador.
