Diario Online

Mihor inverti mas den enseñanza cu inverti den traha mas cel na KIA

Publication: Thursday, 9 February 2012. Categoria: General,Politica

Drs Marisol Tromp:
ORANJESTAD (AAN): Parlamentario independiente drs Marisol Lopez Tromp durante conferencia a comenta riba diferente tema. Un di nan tabata riba criminalidad.
Relaciona cu e casonan di criminalidad cu ta tumando lugar na Aruba bou nos hobennan, mi ta kere cu Gobierno mester actua den un forma fuerte pa combati esaki pero mas aun mas fuerte pa preveni e casonan aki. “Den Parlamento mi a yega di trece un proposicion den forma di un mocion, cu ta tocante un dia prolonga di school pa nos muchanan den ora di merdia. E proposicion aki a worde aproba unanimamente den un reunion publico den Parlamento. Beneficionan pa e mucha pa e ta na school merdia tambe , ta cu e por desaroya su talentonan riba tereno cultural, deportivo y di musica y alavez guia cu huiswerk y cu maestronan specialisa riba e materianan aki. E muchanan lo no ta riba caya sin guia di un adulto. Nos muchanan ta esnan cu Gobierno mester inverti den nan y caminda cu mester traha den un forma preventivo pa guia nan den bon caminda.

Segun expresionnan di hobennan cu a yega di bay sera of a bin den contacto cu husticia, hopi vez nan ta realiza y lamenta cu nan mayornan no a dedica mas tempo pa papia cu nan, scucha nan y actua si ta necesario ora cu nan tabata sinti e necesidad pa esaki of tabata enfrenta problema.

Den un comunidad manera Aruba caminda mayoria mayornan ta traha, un alternativa pa nos muchanan ta un dia di school prolonga, cu materianan cu ta aporta nan un desaroyo sano di nos yiunan. Kico ta costa mas? Inverti den e talentonan y potencial di nos muchanan desde chikito pa nan desaroya nan habilidadnan den un forma positivo y preventivo? Of pone placa riba presupuesto cada vez pa traha mas cel y busca mas specialista pa combati e problemanan multiple cu ta surgi cada vez?