Diario Online

Minister de Meza “Nos a haci reformanan drastico cu dentro y pafo di Reino no conoce su igual”

Publication: Wednesday, 8 February 2012. Categoria: General

Aruba ta cana dilanti cu reforma di sistema di pensioen
ORANJESTAD(AAN): “Aruba ta cana dilanti pa loke ta modernisacion di e sistema di pensioen. E ponencia cu e gobierno aki no ta haci nada, ta un disparate, algo completamente foi sla”, asina Minister di Finanza Mike de Meza ta reacciona riba un noticia di Wereldomroep ta cua ta worde bisa cu “mientras cu den tur otro parti di Reino e asunto di pensioen ta halto riba nan agenda, Aruba ta masha keto mes”. “E sistema di pensioen di Aruba ta solido pa awor y futuro. Esaki ta danki na e reformanan haci door di Gabinete Eman, asina de Meza a enfatisa. “Pa mi ta un misterio con un hende por a keda sin nota cu nos a haci reformanan drastico den AOV y pensioen cu dentro di Reino y pafo di Reino no conoce su igual.

Nos a bin topa cu un situacion financiero critico cu e gobierno anterior a laga atras di cua e consecuencianan a bira pio door di e crisis mundial y a percura pa mehora y sigura e pensioen di behez pa futuro pero tambe pa mantene pagabel”. Dia prome di januari 2012 un pensioen colectivo obligatorio a drenta na vigor, como un suplemento di e AOV.

Na mes momento e mesun AOV aki a worde haci flexibel di forma cu pensionadonan cu tin un asina yama buraco den nan AOV por aumenta nan pensioen di behez door di sigui traha algun aña mas despues di a cumpli 60 aña.

“Punto di salida tabata e ambicion cu AVP tin pa basta tempo caba pa pone un fin na e situacion penoso den cua pensionadonan ta haya na mes aden despues di añanan di un bida laboral duro. Un situacion cu placa no ta yega pa e prome necesidadnan. Pero tambe tabatin e necesidad pa haci reformanan. Ora nos a sinta na fin di 2009 nos a hereda un pais cu tabata casi den bancarota. Si no a haci nada no tabata posibel pa a sigui paga AOV y pensioen”.

“Nos a evita e cataclismo aki. Mi kier subraya si cu esaki no ta solamente merito di gobierno. E sindicatonan y mundo empresarial a hunga un rol importante den Dialogo Social riba e tema aki. E ambtenaarnan envolvi ta merece un compliment grandi pa por a haci cambionan legal den areglonan masha trabahoso den legislacion.

door di esaki a logra soluciona un problema compleho den un tempo record. Tur esaki sin tabatin turbulencia laboral manera den otro pais”, asina de Meza bisa y de paso a mustra cu un di e prome accionnan di Gabinete Mike Eman tabata pa corta den e areglo di pensioen di minister y parlamentarionan.

A haci bon uso di e experticio di Klaas Tuinstra na momento cu a traha riba e reformanan di e sistema di pensioen, asina Minister de Meza a accentua. Tuinstra ta un ex miembro di Parlamento Hulandes di CDA y un experto riba tereno di seguronan social. Mas o menos por califik’e como e arkitecto di modernisacion di e legislacion di pensioen y AOV di Aruba.,,Ainda tin hopi cos cu mester worde haci, pero e situacion ta bou control.

Por compar’e cu un candela grandi. Gobierno a paga e candela pero e restauracion mester cuminsa ainda”. E scenario sumamente pesimista pinta door di ex docente Staats- y Bestuursrecht Renee van Aller cu pensionadonan na 2025 ta haya solamente mita di nan pensioen, ta egun Tuinstra un ridiculez. “Esey lo tabata e caso si no a haci e cambionan necesario, Aruba a cay den un abismo, pero e gobierno aki a haci e cambionan”.

De Meza: ,,E storia di señoravan Aller ta pata pata di gañamento cu a worde treci dilanti como berdadnan, pero cu echonan nan por worde desenmascara masha simpel mes. E ponencia por ehempel cu gobierno ta retene prima di pensioen di ambtenaar, pero no ta entrega esaki, ta algo cu e mes a fabrica. Un gañamento atrobe.

Su teoria cu sin un injeccion di 55 miyon e fondo di AOV lo agota, tambe ta otro disparate. door di a tuma e medidanan corecto manera aumenta e limitacion di prima, individualisa AOV, cambio di e grondslag y introduccion di Flex pensioen, e fondo ta stabilisa su mes den e añanan cu ta bin. Cu e medidanan aki nos por anticipa door e 7 mil persona cu ta bay cobra AOV den e diez añanan nos dilanti.

E ofensa den direccion di Centraal Bureau voor de Statistiek (CBS) tampoco ta na su lugar. Danki na e reportahenan adecuado di CBS nos por calcula exactamente kico mester pa yena e buraconan di pasado”

,,Sin ningun base ta hinca miedo den e pueblo di Aruba. Repudiabel sigur ta tambe e sugerencia cu e actual Gabinete lo ta culpabel di e debe di 2,5 biyon Florin. For di momento cu nos a sinta nos a baha e deficit presupuestario cu 75 miyon Florin mientras cu na mes momento nos ta inverti cientos di miyones den mehora e calidad di bida di nos hendenan.

No ta por nada cu institutonan di evaluacion manera Fitch y Standard & Poor’s a ahusta nan evaluacion pa Aruba positivamente. E reproche cu nos no ta informa y envolvi e ciudadano suficiente di e pensioen di behez ta otro mahadera.

 Nos a hasta tene anochinan di informsacion na unda Prome Minister tabata personalmente presente pa contesta preguntanan riba e tema aki. Mi no tin ningun problema cu oposicion ta critica nos maneho, pero e sorto di ‘noticianan’ aki mi ta cataloga como nada mas cu un campaña difamatorio”.

“Desde cu nos a tuma mando e situacion financiero di pais Aruba tin nos completo atencion. Haci finanza di gobierno saludabel ta un punto di enfoke di e Gabinete aki. Pensioennan ta un parti di e total.

Awor cu nan a worde rescata tin un otro tarea grandi ta warda nos: reformacion di AZV. Mi tin tur confianza cu den cuadro di e Dialogo Social nos por yega na bon palabracion pa mehora e calidad di cuido, ten’e acesibel pa tur hende y pagabel pa gobierno. Como gobierno nos no ta haci esaki facil pa nos mes. Mucho mas simpel tabata pa austerisa grandemente riba loke gobierno ta ofrece y hisa belasting. Pero nos kier traha riba un sociedad duradero na unda bienestar y prosperidad ta den balansa cu otro, na unda solidaridad ta bin back manera cu e tabata antes”.

Diabierna awor e Minister nobo di Asuntonan Interior y Relacionnan di Reino señoramr.drs.Liesbeth Spies ta haci un bishita di introduccion na Aruba. “Un punto cu sigur ta riba agenda ta con concretisa e acuerdonan haci den e protocol di cooperacion. E bunita di e protocol aki ta cu e tin igualdad como punto di salida.

Cada un di nos ta keda responsabel pa nos pais y gobernacion, pero ta pone forsa hunto pa saca probecho di e fluho comercial cresciente entre Latino America y Europa cu Aruba como trampolin’, asina de Meza a conclui e entrevista.