Minister Oduber orguyoso di e inversion haci pa optimaliza e servicio na publico y instancianan concerni
Departamento Meteorologico Aruba a haya software sismologico nobo
ORANJESTAD(AAN): Diamars atardi na Departamento Meteorologico Aruba (DMA) Minister Otmar Oduber a presenta un software nobo riba terno sismologico.
Ta asina cu promer cu a instala e software aki, den caso di un temblor, tur e datonan tabata worde haci manualmente, lo cual tabata trece demora den e difusion di informacion na e instancianan concerni.
DMA tabata den hopi necesidad di un software sismologico pa analiza y optimaliza e dunamomento di informacion na instancianan y publico den caso di temblor y of tsunaminan. E tipo di servicio sismologico aki na publico y aeropuerto ta worde exigi door di WMO/ICAO. IOC y Unesco.
Asina, den cuadro di inversionnan cu continuamente ta haciendo y cu ta necesario basa riba decisionnan tuma door di Gobierno di independiza servicio meteorologico na Aruba, cual a tuma lugar caba, Minister Oduber a presenta na prensa e software nobo.
E software aki por determina cu hopi precision diferente teremotonan cu ta worde sinti. Hunto cune a inverti tambe den hardware necesario, mientras cu den futuro lo tin mas inversionnan tumando lugar na e departamento aki pa haci su servicio uno optimal pa nos comunidad, aeropuerto y diferente otro instancia na Aruba.
DMA a acerca e compania Instrumental Software Technologies Inc (ISTI) pa no solamente cumpra e software, pero tambe pa duna e training necesario na esnan di DMA.
A cumpra e Eartworm software ( cu ta detecta acontecimientonan sismico regional); Earlybird Software (ta bin cu e Earthworm y ta un netwerk di pre-aviso pa teremotonan y tsumaninan); Quakewatch Software ( ta mustra e imagen segun e Graphical Information System di e percepcion, locacionnan y con fuerte e temblor tabata); ademas di esaki a ofrecce training na personal di DMA tocante sismologia.
E proyecto importante aki a worde presupuesta den presupuesto 2011 y tabatin un costo di Afl. 15,697.50.
Minister Otmar Oduber a desea Marck Oduber y demas persona laborando na DMA hopi exito pa cu e ekiponan cu a adkiri y cu ta contribui na un mihor servicio na instancianan concerni como tambe na pueblo en general.
Despues di e presentacion, Minister Oduber a haci entrega di e certificadonan di participacion na tur e trahadornan di DMA cu a sigui e curso di sismologia.
