PDR cu proposicion di ley pa victimanan di crimen wordo scucha door di Huez
ORANJESTAD (AAN) – Parlamentario mr. Andin Bikker, lider di fraccion di PDR, a duna di conoce den conferencia di prensa cu nan ta trahando riba otro propuesta di ley, ya cu hopi hende ta acerca e fraccion y ta reclama cu e proceso den casonan penal hopi biaha no tin mucho di bisa como victimanan. E parlamentario a referi, como ehemplo, na casonan di tatanan cu nan yiunan chikito a bira victima di maltrato, y cu hopi biaha no ta wordo scucha door di Huez, of no tin un obligacion di Huez pa scucha nan.
Parlamentario mr. Bikker a splica cu den e sistema Hulandes cu nos a hereda, ta enfoca intensamente riba e acusado, pero esnan cu a sufri directo of indirectamente door di e crimen di e acusado, ta sinti cu nan no a wordo scucha of no ta wordo scucha suficiente.
Lider di PDR a menciona cu na Hulanda nan a introduci un proposicion di ley pa amplia e derechonan di e victima of esnan cu di forma directo of indirecto ta wordo afecta door di e crimen pa nan wordo scucha door di Huez.
“Esaki ta algo cu nos ta aplaudi y nos ta bay presenta un propuesta di ley pa introduci esaki”, mr. Bikker a subraya.
El a agrega cu den e Codigo Penal cu e ta spera cu lo wordo trata pronto, tin un ampliacion caba pa loke ta trata e “varieren termijn” ki ora un crimen ta caduca, pero esaki ta den esfera penal, pero hopi biaha por ripara cu tin personanan cu despues di hopi aña nan kier entrega un “claim” civil pa dañonan cu nan a sufri door di un crimen, e “varieren termijn” den nos Codigo Civil ta aplicable.
Na Hulanda tambe nan a bin cu un propuesta di ley, recientemente, pa amplia esaki pa no perhudica e victimanan, of cu kizas despues di basta aña ta bin realiza kico ta e mal hecho cu a wordo haci na nan, y ta e ora ey numa e “varieren termijn” a pasa caba y esaki no ta husto.
“ Ta tres propuesta di ley concreto, pasobra nos no solamente ta señala un problema, pero nos ta bin cu posible solucionnan, y ta cosnan cu ya caba ta biba den otro paisnan cu sea ya ta den proceso pa traha ley of ya caba ta aplicable como leynan vigente”, mr. Bikker a splica.
El a agrega cu esakinan ta tres ingrediente adicional di e ley di defensa propio, e ley di sanacion financiero personal y tambe e vigilancia civil cu siman pasa PDR a propone pa wordo introduci, y cu nan ta bay traha lugar pe den e presupuesto alternativo, cu lo wordo presenta durante tratamento di presupuesto, proximamente.
