Polis di trafico eherciendo control severo den dia y anochi, y ta getow tur auto para riba acera!
Inspector Richard Kramers:
ORANJESTAD (AAN) – Inspector Richard Kramers, di Departamento Trafico a duna di conoc de un enuentro cu prensa, den cual por a lanza pregunta riba e control cu ta tumaneo lugar den trafico, cu polis ta eherciendo e control aki tanto den dia como anochi. Na haltura di Chaos Cafe, den Wilheminastraat y otro cayanan, polis a haci control y a duna process verbal, na chofernan cu a staciona nan auto riba acera y otro puntonan cu no mag haci esaki. Diabierna anochi a worde traha un total di 28 process verbal. Dia 28 di Januari dilanti Chaos Café a duna 12 process verbal, na personanan cu a sali for di un happy our, y tur e autonan ey a worde kita y e doñonan di auto a haya process verbal for di polis.
Inspector Kramers a duna di conoce cu nan tin control riba diferente dia, esey kiermen cu di e siete dianan di siman nan ta scoge cuatro y nan ta varie, mainta y anochi, y depende di e otro accionnan cu polis tin, nan ta wak con nan ta set up e personal.
E funcionario policial a bisa cu e mesun hendenan cu nan tin pa Surveillance Dienst, ta e mesun personanan cu ta haci control di trafico anochi, den oranan extra. E control cu nan a cuminza diabierna cu a pasa lo continua den siman riba dianan regular, y si un dia polis no tabata tey, e hendenan tabata tin suerte pero dia cu polis tey nan auto ta worde kita y e chofernan concerni ta haya multa, y e cobranza di 25 Florin ta keda normal pa tur auto cu polis ta kita.
Sr. Kramers a subraya cu si un auto para riba acera no mester tin borchi di trafico pa e chofer sa cu e ta contra ley di trafico. E aceranan ta destina pa e peaton y no pa staciona auto. Si un persona ta para 25 meter di un cruzada tampoco mester tin borchi pa e persona no para eynan. Asina cu e comete e infraccion aki, su auto ta worde kita mirando cu el a stroba e trafico.
Richard Kramers a remarca cu mirando cu pa asina tanto tempo e situacion aki no a worde atendi, y el a worde tolera, polis a cuminza for di November y December caba y a sigui na Januari y aworaki na Februari, cu control. El a agrega cu polis ta nota si, cu e cantidad di autonan cu ta worde kita a cuminza baha.
Esey ta mustra cu hopi hende cu ta bin na Oranjestad a cuminza nota cu e control di polis tey basta regular, y por nota cu e problema a cuminza merma. Inspector Kramers a subraya cu e por tuma algun tempo mas, pa tur hende cu ta bin Oranjestad sa cu no ta tolera pa staciona auto di tur manera cu ta stroba e circulacion di trafico.
E funcionario a enfatiza cu asina cu polis mira un auto staciona di manera cu e ta stroba auto, esaki ta worde getow mesora y e persona mester bin buske y pa cada dia cu e no haci esaki e tin cu paga 25 Florin. Si pasa un temporada hopi largo polis ta tuma contacto cu Ministerio Publico, y nan ta tuma un decision si polis ta deshaci di e auto.
Inspector Kramers a bisa cu ningun situacion ta autoriza un persona pa laga su auto mal para riba caminda publico. Si pa motibo cu stacionamentonan ta yen y e chofer ta dicidi di para su auto meymey di un cruzada pa bay haci compranan, esaki ta inaceptable.
No tin ningun situacion cu ta duna un chofer e derecho di stroba e fluho di trafico, el a reitera. Si den ciudad tur stacionamento ta yen, e mester busca un otro manera pa bay para un tiki mas leu y cana bin den centro di ciudad.
Inspector Kramers a remarca cu e acera tey pa e peaton cana safe riba dje, y polis mes a nota cu tin mamanan cu tin cu baha caminda cu un bay den stroller pasobra e acera ta yen di auto parkea y intencion ta pa evita cu e peaton sigui core peligro door di esaki.
