Presidente di SAC, Tecla Kelly, satisfecho cu parada Grandi y final di carnaval
ORANJESTAD (AAN) – Diadomingo anochi laat, Matutino DIARIO a acerca señora Tecla Kelly, presidente di SAC, pa un entrevista tocante con tur cos a bay y practicamente culmina, pa loke ta trata Carnaval 58. Sra. Kelly a mustra satisfecho con e parada a bay. El a cuminza un ora mas laat pero despues a recupera tempo y a caba na e ora palabra. Tabata tin un gap chikito pero por a hala tur hende aden pa e sigui su caminda normal y prome cu solo a baha full e parada a yega na D.O.W. E aña aki SAC a traha den cooperacion estrecho cu Cuerpo Policial, pa loke ta concerni e prome paradanan pero esun di Diadomingo a bay back na e estilo tradicional, unda cu polisnan a doe mee y cana hunto cu e gruponan y hunto cu SAC a logra di mantene tur grupo hunto, pa evita cu algo por a bay for di man.
Sra. Kelly a señala cu e fayo tecnico cu tabata tin cu un di e bandanan musical ta algo cu por sosode y cu no por haci nada na dje, pero e ta contento cu no a trece mucho efecto y gradici cu esnan cu a yuda pa e parada tog por a sigui.
Apesar cu tabata tin un retraso di un ora (palabracion tabata pa e sali 11’or di mainta) un bez cu e parada a ranca sali tur cos a bay segun schedule y tur grupo a haya suficiente espacio pa balia, segun sra. Tecla Kelly a declara.
Ta asina tambe cu tabata tin menos participante e biaha aki. Sra. Kelly a menciona cu e por a compronde di varios persona cu no a participa e aña aki, cu e factor financiero a hunga un rol, ya cu e situacion actual no ta di gaba y hopi hende ta prefera pa wak e florin “di dos banda”.
Otro factor ta e seguridad. Tin hende cu a bira mas cauteloso debi na loke a sosode añanan anterior unda cu hasta a mata un hende na final di un parada.
Carnaval 58 riba su mes no tabata un actividad facil pa realiza. For di cuminzamento a confronta cu un par di obstaculo cu a keda persisti y a pone cu nan a cay cu diferente aspecto, entre otro e preparacionnan cu ta suppose mester a keda cla mas tempran, loke a pone cu mester a core contra holoshi, pero mester a cumpli segun schedule, cu un programa cu tabata tey, y no por a sigui haci cambio pasobra un ta hiba na otro y na final e carnaval por a bira un free for all, locual no tabata e idea.
Sra. Kelly a subraya cu tog, tur cos a draai riba e carnaval grandi di Diadomingo 19, y nan a haci e maximo esfuerzo pa tur cos ta na orden y a logra.
