Pueblo cu hopi elogio pa iniciativa di Minister Otmar Oduber pa bin cu tentnan colorido riba Boulevard
ORANJESTAD(AAN): Ya pa algun dia caba por mira tentnan colorido cu logo nobo di Aruba dornando parti di ruta di Carnaval. DIARIO a ricibi masha hopi yamada comentado riba esaki caminda casi tur tabata gaba e idea aki cu a bin for di Minister Otmar Oduber y cu a worde realiza conhuntamente cu DOW. E tentnan aki no solamente ta embeyece e ruta di Carnaval riba L.G. Smith Boulevard, pero tambe ta forma parti di e integracion di e identidad nobo di Aruba, e branding di Aruba, pa turista como tambe pa henter nos comunidad comunidad. Ventahanan pa uso di tent ta varios, por menciona no solamente cu ta embeyece nos ruta di Carnaval cu un “look“ consistente, evitando cu tin trailernan di diferente color, tamaño y estado banda di caminda, ta yuda promove nos logo nobo riba nivel local como internacional, ta proteha e buniteza di linear park cu ta kedando cla, y posiblemente e mas importante ta e aspecto di seguridad cu ta worde hisa.
Awor cu tin tent y no trailer tin hopi mas visibilidad pa cuerpo policial, door cu nan no tin murayanan sera unda hende por sconde y ta evita e bringamentonan tras di trailer.
Esaki lo trece cune un nivel halto di seguridad pa espectadornan y tambe participantenan. DIARIO ta uni nos mes na peticion di Gobierno y DOW pa por fabor cuida y yuda mantene e bunita tentnan aki pa asina pueblo por disfruta di nan pa hopi aña.
Un biaha mas ta bay un pabien grandi na Minister Otmar Oduber cu a bin cu un iniciativa asina cu ta permiti toch pa pueblo tin kavel riba L.G. Smith Boulevard, pero na un manera hopi bunita, colorido y promocionando e imagen nobo di Aruba.
Unico dificultad ainda: Disponibilidad di toilets! Den pasado, tur trailer tabatin nan mesun WC. Awor cu tin tent… lo bay tin toilet publico na cantidad suficiente eybanda?
