SABA ta hisando su calidad di servicio na nos grandinan
Gobierno ta aportando cent extra tambe
ORANJESTAD (AAN) – Manera ta conoci e Centro di cuido pa nos grandinan den Palisiaweg, na San Nicolas, a keda oficialmente habri aña pasa. Minister Michelle Hooyboer- Winklaar a bisa cu e aña ey nan a pone riba presupuesto un suma extra cu a bay pa tuma hende extra den dienst, cu ta un total di 13 persona. E aña aki gobierno a pone 1.5 miyon Florin adicional tambe, riba e presupuesto di SABA, cu ta worde destina specificamente pa e Centro di Cuido na San Nicolas.
Minister di Asunto Social a señala cu e ta calcula cu alomenos 25 persona extra por worde tuma den servicio, locual ta significante pa e Cas di Cuido unda segun e dignatario dos of tres cas mas por worde habri.
Cu tur e renovacionnan cu a tuma lugar acerca, e dignatario a calcula cu e aña aki lo por tin alomenos 90 cama extra pa personanan cu ta wardando cuido den un of otro cas, incluyendo Maris Stella cu ta bao di renovacion y cu ta finaliza entre Juni cu Juli proximo.
Esaki ta rekeri tambe di extra personal, y pesey gobierno a pone fondonan disponible specificamente, den su presupuesto di 2012.
E mandatario a bisa cu tin un demanda hopi grandi pa cuido y calidad di cuido tambe, y SABA, cu ta bay cumpli 40 aña di existencia, ta haciendo un tremendo trabao.
Durante e reunion mas reciente cu SABA, e aspecto aki a bin dilanti, como tambe kico ta e conocimento di nos grandinan, cu no ta solamente cu nan mester di un lugar pa keda sino cu nan tin otro tipo di necesidad di cuido, y akinan SABA ta mehorando, door di upgrade su personal, pasobra no ta solamente duna e grandinan algo di come y bebe y un cama pa drumi, pero pa hisa e calidad di nan bida door di percura pa nan un ambiente feliz y sigur, y cada bez nan ta wak kico nan mester pa sigui mehora nan calidad di servicio pa nos grandinan.
Tin un otro tipo di servicio cu tambe algun di nos grandinan mester, y esaki ta specificamente pa esnan cu no ta sinti nan mes prepara pa sali for di nan cas, unda nan a biba kizas 70 pa 80 aña pa bay den un cas di SABA.
Gobierno hunto cu SABA ta bezig pa pone hende bishita e grandinan aki den nan cas y duna nan sosten den e partinan cu nan no por yuda nan so.
Nan ta trahando riba un proyecto di cuido mainta, unda personanan di SABA ta bin duna e grandi su remedi, tuma nan presion, etc. Esaki ta un bashi cu por yega den nos comunidad, pa hendenan grandi cu tog por biba un tiki mas independiente, pero cu mester di extra cuido cu sea SABA mes por duna of Wit Gele Kruis.
Minister Hooyboer- Winklaar a agrega cu tin investigacionnan cu mester worde haci pa tin mas conocimento riba e necesidadnan di nos grandinan, y CBS ta hopi bezig cu esey, pa wak kico ta précis e trend cu tin.
Gobierno a haya diferente di e rapportnan cu CBS a saca a base di censo 2010, cu ta duna un bista kico tin eyfo y kico ta bay ta e parti mas importante cu gobierno ta bay enfoca riba dje, pa e mehora e cuido cu ta worde duna na nos grandinan y prepara eventualmente, y prepara pa e cantidad di peticionnan cu ta bay tin pa e tipo di cuido aki.
