SATA a haya doño nobo y diabierna awor trahadornan ta haya salario y bonus
Abogado Duijneveld a splica:
ORANJESTAD (AAN) – Den entrevista cu DIARIO a realiza cu abogado mr. Edwin Duijneveld, el a splica tocante e caso di e trahadornan di “Aviation Ground Services NV (SATA). Abogado mr. Duijneveld a splica cu Diabierna cu a pasa, apesar cu e trahadornan a gana e caso di e bonus, nan no a hay ni salario ni e bonus, pasobra e compania simplemente a bisa nan cu nan no por paga.
E trahadornan a bisa cu ta basta y cu si nan no haya e salario di e luna pasa y di esun actual, nan ta pone trabao abao. E compania a pidi nan pa bin traha tog, pa nan pensa riba e bienestar di Aruba, pero e trahadornan tin nan gastonan pa luna, nan tin nan famia pa sostene, y nan tambe tin cu come y nan a dicidi cu no, cu tanten cu no tin salario nan no ta bay reanuda trabao.
Mediador tambe a presenta na Aeropuerto, y eynan a bisa cu tin algun hende interesa pa cumpra e compania y cu tin algun placa cu gobierno tin su man riba dje di SATA, pa wak kico por a haci den fin di siman y un peticion a worde haci na e trahadornan pa den fin di siman tog, sigui traha.
Nan a bisa bon cla cu nan ta hacie pa cara di Aruba, no pa e compania ni su doño, señor Leonora pasobra nan no tin confianza mas den dje.
Nan a acepta pa keda traha den fin di siman si nan por a haya 300 Florin cada un, locual ta nada, pero manera Mediador a bisa, sikiera pa nan cumpra un kipashi den fin di siman pasobra nan tambe tin yiu cu mester come, y dialuna a resulta cu no tabata tin mucho cos nobo.
Gobierno no por a haci mucho pa e trahadornan pasobra cierto suma cu nan a bisa cu tey, no tabata tey, y e trahadornan a bisa awor si ta basta.
Mientras tanto e Mediador a bisa cu tin dos hende interesa pa cumpra y tuma over e compania y a pidi nan pa duna un tiki mas tempo. Pero e trahadornan sa cu si nan pone trabao abao Aeropuerto lo kita e concesion mesora y cos ta caba.
Y como cu tin un persona cu ta cla pa tuma e concesion, y cu ta dispuesto pa tuma e compania y tur su trahadornan cu nan derechonan, e trahadornan a dicidi di manda un ultimo carta, cu si diamars 12’ or tin nada concreto di banda di SATA, nan mes ta pidi bancarota di e compania.
Den e reunion di diamars ultimo, un miembro di e directiva di SATA a presenta hunto cu un meneer di fam Henriquez, ken a laga sa cu e ta practicamente cla pa tuma e compania over, cu e tin un acuerdo caba cu señor Leonora.
E trahadornan a bisa cu e ta papia bunita, pero a puntra ki garantia nan tin? Pasobra nan ta trahando tur e dianan caba y nan no sa mes si nan ta bay haya nan salario di Januari, y el a bisa nan cu unico cos cu e mester ta un tiki mas tempo, cu e lo caba e asunto aki diamars atardi y cu den dos of tres dia e por paga e trahadornan nan salario y nan bonus.
E abogado a puntra e persona aki dilanti di e trahadornan si e ta dispuesto pa confirma esaki den un carta den cual ta worde bisa cu si e trahadornan ta dune e tempo, diabierna nan lo haya nan salario y na bonus. Señor Henriquez a bisa pa manda e carta numa pasobra asina e ta.
Di parti di e trahadornan nan a bisa cu ta bon, cu nan ta wanta un tiki mas, aunke nan tabata tin duda si señor Leonora tabata tras di esaki, pero e doño nobo di e compania a bisa cu absolutamente esey no ta e caso.
Señor Henriquez a worde bisa di parti di e trahadornan cu nan no tin ni un tiki confianza den e gerencia, pasobra tur e tempo aki nan tabata sa kico ta pasando cu e compania, y cu basicamente nan a laga esaki tuma lugar.
Importante ta aworaki cu sr. Henriquez a bisa y a haci un promesa fuerte cu e tin un deal cu Leonora pa tuma SATA over y cu e lo garantiza e trahadornan nan pago, mas tarda diabierna awor.
E 115 trahadornan a bisa cu esaki ta nan pan di cada dia, cu no ta un grupo chikito si nan tin cu keda riba caya asina sin mas, y sigur Aeropuerto tampoco lo por maneha un golpi cu un grupo asina grandi no ta presenta mas na trabao. Kiermen, nan ta bay presenta na trabao diabierna.
