Tips pa tene cuenta cune ora di haci compras
Hopi biaha nos ta bay haci compras y no ta tene cuenta cu diferente aspecto. Awe nos ta duna algun tips cu lo ta bon pa tene cuenta cune. Un di e cosnan importante ta cu bo tin derecho di haya un recibo pa bo compras pasobra si resulta cu e producto of loke bo a cumpra no ta bon bo por bay reclama. Si bo cumpra cuminda chinees of cualkier otro restaurant (nos a usa cuminda chinees pasobra esaki ta e mas bendi) y abo of un familiar bira malo bo tin prueba den man cu e recibo for di unda e cuminda ta procedente.
ORA DI BAY HACI COMPRAS TENE CUENTA CU E SIGUIENTE TIPSNAN:
1. BO TIN CU PENSA BON KICO BO MESTER.
Repasa loke bo tin ainda y cua productonan bo falta.
E mihor manera pa logra esaki ta teniendo cuenta cu cada
seccion di consumo. Bao di comestibles bo ta haya p.e.
groceries(cuminda na bleki),frozen, berdura, beleg, juice.
Ta resulta mas facil si pa cada seccion bo check bon kico
bo mester.
2. TUMA TEMPO Y TRAHA LISTA DI COMPRA TRANKIL NA CAS, PROMER CU BO SALI.
Unabes bo sa kico nan bo mester, segun cada seccion, esta comestibles, articulo di limpiesa, hygiena etc. bo tin evalua cuanan ta mas necesario y kico ta bo
forsa di compra. Ademas lo bo tin cu tene cuenta pa cumpra comestible necesario pa e periodo completo. Sea bo ta cumprando pa siman o quincena, wak pa e productonan ta cubri e periodo ey. Akinan bo mester tene cuenta si cu tin productos e.o. berdura, fruta y beleg cu no ta wanta hopi tempo.
Importante di e lista ta cu e ta yuda bo cumpra loke bo a pensa di cumpra, loke bo mester y lo bo no lubida nada. Fuera di esey segun cu bo ta haci compras lo bo por nota kico ya bo a haya y loke cu bo no haya lo bo mester busca na otro lugar. Mas importante ainda ta cu riba e lista segun cu bo escoge un producto lo bo por nota e prijs y asina bo por tin control ora di paga na caha.
3. INFORMA BO MES UNDA E PRODUCTONAN TA MAS BARATA.
Cu e lista lo bo por bay tene cuenta tambe cua productonan ta mas caro na cierto lugar y cua no. E lista por sirbi tambe como control a base di experiencia den cumpra o propio constatacion. Tambe informacion di conocirnan lo por yuda bo haya sa unda ta mihor pa compra cierto productonan. Tambe fundacion C.A.S. lo por ta dispone di informacion di unda cierto producto ta mas barata y unda sigur e ta mas caro, esta unda no cumpra tal producto.
4. SALI HACI COMPRAS NO MAS CU E SUMA NECESARIO SO.
Ta algo comun entre consumidor cu si nan mira algo cu nan gusta, pero cu nan NO a sali pa cumpra, y nan tin placa den saco, nan lo cumpra esaki. E sistema di
propaganda ta traha riba esaki. E tiendanan tambe ta traha riba esaki. Supermercado ta traha a base di esaki, esta cu e consumidor ta hañe rondona pa tur clase di producto cu e por desea; nan ta presenta producto mas atractivo posibel y mayoria biaha esaki ta haci cu e consumidor ta yega cas cu producto cu ningun momento so el a pensa di cumpra. Pio ainda e gasto cu el a calcula na fl. 50,00 ta resulta dos o tres biaha mas hopi. Evita esaki y sali cu e placa necesario cu bo a calcula segun bo lista.
5. TENE CUIDAO CU SPECIALS.
Como cu “ specials” mayoria biaha ta ser ofreci pa productonan machika, cu fecha cu a expira y dañino pa salud di hende. Den otro casonan “specials” semper ta bay parew cu prijsnan halto riba otro producto. Aki atrobe ta importante pa bo mantene bo mes na bo lista. No cumpra loke bo NO a pensa di cumpra.Ta abo ta dicidi kico bo ta cumpra.
6. CUMPRA SOLAMENTE LOCUAL TIN PARA RIBA E LISTA.
Esaki lo bira bo punto fuerte contra tur clase di triki cu
ser usa pa pone bo cumpra loke bo no kier a sali cumpra.
Tene bo mes na e lista y lo bo no efectua compras cu bo no
kier a haci y gasta placa cu bo no a pensa di gasta.
7. NENGA DI CUMPRA PRODUCTONAN CU NO TA CUMPLI CU EXIGENCIA MINIMO MANERA:
Producto den mal estado, machika, bleki frustia, paki habri carni bieu, o producto cu fecha di expiracion a vence, productonan cu NO tin indicacion di prijs, o producto cu tin prijs maximo, pero cu ta worde bendi mas caro, y en
general producto cu segun BO EXPERENICA o informacion recibi for di conocir o for di C.A.S. ta ser bendi hopi caro.
8. NO LAGA PROPAGANDA INFLUENCIA BO.
Ni cuanto un producto ser propaga, no laga esaki bira e motibo pa cumpre. Mira cuanto propaganda excesivo y engañoso ta ser haci.
9. COMPARA PRIJS Y PURBA CU MARCA MAS BARATA.
Den tur bo movecion como consumidor tur ora compara prijsnan y si tin mesun producto pero cu otro marca ta ser ofreci riba mercado, purba esakinan. Hopi biaha lo bo ripara cu ta pa e marca bo tabata paga mas. Tin hopi producto cu no ta di calidad inferior cu esnan di marca renombra.
11. SI PRODUCTO O TRATO A RESULTA MALO, EHERCE BO DERECHO Y RECLAMA.
Den caso cu bo no ta satisfecho cu e calidad/prijs di producto of servicio o trato y practica di negoshi, reclama y si esaki no yuda tuma contacto cu C.A.S. na telf. 584-2050 pa asina por pone consumidornan atento di esaki.
12. PA TUR COMPRA EXIGI BO RECIBO.
Cada compra ta un contrato unda abo tin cu paga y recibi producto/servicio. E recibo ta bo comprobante cu bo a cumpli cu bo parti, pero alaves e ta bo entrada den busca bo derechonan. Un recibo mester contene por lo menos:
Nomber y adres di e negoshi
fecha ( y ora) di compra.
Tipo y descripcion di producto;
Cantidad(volumen-peso) di producto
costo di cada producto;
suma total cu bo tin cu paga.
Aunke cu avance technologico ta haci e obligacion aki facil pa e bendedor, un recibo skirbi na man tambe ta cumpli cu e proposito, basta cu e ta contene tur informacion necesario.
Falta di un recibo por trece problema e.o.
cu bo lo no a paga;
bo no sa cuanto bo a paga pa kico;
y si producto resulta malo-danjino ta dificil pa eherce bo derecho.
Ademas no tin mihor control riba prijs cu ta warda bo recibonan pa por comproba pa bo mes.
