Trahando for di cas por tin beneficio pa e empresa y trahador!
Hopi biaha nos ta djis sigui un cultura den trabao y ta kere cu esey ta e mihor con mester funciona. Nos ta bibando den un mercado hopi cambiante pero na final resultado ta conta, y ta resultado ta importante y na di dos lugar ta bini e sistema cu a worde usa pa yega na e resultado ey. E mercado laboral actualmente ta mas global y no mester tey semper hunto hinca den un oficina pa asina e trabao por desaroya bon. Tecnologia ta asina avansa cu por traha un otro caminda y tog tin aceso na comunicacion y hasta por monitor un persona e cantidad di ora cu e ta trahando y tambe loke e ta haciendo na e momento ey, dus si por monitor su trabao y check e resultado tambe direct online, dus e persona aki por traha cualkier parti di mundo y no ta afecta nada. Actualmente tin conference calls/skype/ cu por facilita tur e proceso di trabao. Traha for di cas no ta dje conoci ey aki na Aruba pero ta pasando ya caba bastante den e mercado laboral, manera un muher cu a haya complicacion durante di embarazo y mester keda cas mas tempo pero tog tin tempo pa sigui traha su trabao na cas, den su comodidad na cas y tin biaha hasta cu mihor resultado door cu e persona aki tin menos stress door cu ta traha den su zona comodo na cas y dunando bon resultadonan.
Tambe tin personanan cu cierto problemanan di salud cu ta haci dificil pa bay trabao tur dia y nan ta hiba e trabao nan cas y ta traha na cas y ta bay trabao menos, solamente ora cu mester di ta den reunion of trata cliente etc.
Un recepcionista por ta na un otro lugar y tog e comunicacion no ta worde stroba, tin cierto aerolineanan cu ora bo yama nan, semper tin un otro pais cu ta coy e telefon y ta dunabo e mesun contesta cu esun aki na Aruba door di un structura bon den esaki. Traha for di cas sigur lo mira un crecemento pa e aña aki y empresanan cu kier baha gastonan operacional lo por cuminsa pensa den e direccion aki y esaki lo por baha stress na trabao y tambe cu tanto persona ta keda cas malo.
Si un persona ta sinti cu na cas e por traha mihor y tog duna un resultado bon y satisfactorio pa e empresa y tambe lo yuda baha gastonan na oficina, esaki lo ta hopi bon. Si pone den practica pa un temporada y duna bon resultado, esaki lo por bira un opcion sigur door cu sigur gastonan na oficina lo baha, y si e persona ta duna mihor resultado den su trabao door di traha oranan flexible na cas, sigur e stress lo baha y e persona aki por ta hasta mas creativo.
Pa e manager-nan lo nan mester por maneha resultado mas y no mucho riba maneha e proceso den e trabao, y corda cu proceso por diferencia di cada persona, cada trahador ta haci su mesun proceso den trabao diferente pero na final e resultado mester ta bon y satisfactorio. Algo cu por stroba e proceso aki ta ora bo tin e cultura cu hefenan mester tin control absoluto den e proceso di trabao, nan ta worde paga pa maneha proceso mas cu resultado.
Na final di dia e empresa mester paga pa resultado di e trabao y no presencia na trabao! Hopi biaha ta confundi esaki y ta pone mucho atencion na proceso y no resultado, un empresa ta factura resultado di e trabao cu a worde haci.
Trahando for di cas ta duna mas enfasis riba e resultado pa e empresa y na mes momento ta duna espacio pa mehora e proceso na banda di e trahador cu na final mester duna un bon resultado. No ta tur persona por traha na cas door di e tipo di profesion, caracter y tambe e seguridad di informacionnan confidencial tambe ta hunga un rol y esaki ta bay tambe riba e confianza cu tin cu e trahador cu ta trahando na cas.
Tecnologia ta na fabor di e proceso aki y ya tin tur structura cla caba pa asina por haci trahamento for di cas posibel. Pa loke ta gastonan operacional esaki tambe lo ta na beneficio di e empresa door cu por usa e oficina mas eficiente dus menos localidad y tambe utilidad nan sigur lo baha bastante. Un trahador cu por traha na cas mester ta motiva pa logra metanan y mester ta disciplina pa tambe haci e trabao, loke mester mantene ta un linea entre trabao y e bida personal.
Sigur ora un trahador ta trahando comodo lo duna un mihor resultado cu lo ta na beneficio di e empresa y tambe e trahador mes.
