Diario Online

Un Carnaval superior

Publication: Tuesday, 21 February 2012. Categoria: General

Ta dificil presencia carnaval na Aruba y djis lague pasa como algo comun, algo cu ta djis tuma lugar un biaha pa aña y djey ta pasa pa olvido, o ta stiwa den cualke galeria di recuerdonan personal. Mi ta contento cu no ta asina, pasobra e carnaval di Aruba a progresa tanto, cu cualke Arubiano cu ta stima su isla y su Pueblo no por laga di sinti su mes tremendamente orguyoso di tur dos. Mi ta corda tempo cu Nuhad y ami tabata participa, y den un ocasion nos a presenta cu dos corona como body piece, keriendo e tempo ey cu como nos a gana premio, e tabata lo plus ultra, lo imbatible, lo representativo di perfeccion. Nan tabata bunita, sin duda, y bon confecciona, pero mirando loke mi a mira diadoming durante e parada grandi na Playa, mi a keda satisfecho cu nan, pero mi mester admiti cu nan a ser supera grandemente. Y no ta kedami otro cos cu elogia esnan cu a organiza e parada, e Polisnan cu a guie te un bon fin, y tur e participantenan cu a pone nan gran talentonan creativo di manifiesto. Tabata tin carozanan y body piecenan cu tabata lagabo paraliza, bo wowonan yen di incredulidad, pasobra nan a demostra cu beyeza mes y tecnica di confeccion a yega nan top.

Ami semper a considera carnaval un manifestacion di musica, color y alegria, y di eseynan tabata tin un abundancia increible. Pero loke mas a yama mi atencion tabata e creatividad, e imaginacion sin limite cu a ser poni den e elaboracion di e bodypiecenan y carozanan.

Cu nos mesun hendenan por a yega asina leu di crea obranan di tanto beyeza y perfeccion merece tur clase di elogio. Nos tur ta spera cu carnaval ta progresa di un aña pa otro, pero e biaha aki el a dal un salto asina grandi pa futuro cu ta bay tuma hopi igeniosidad pa iguale. No ban papia mes di supere, aunke e tin tur e indicativonan cu e proximo aña e ta bay saca su halanan y bula den e regionnan di creativad y imaginacion inconcebible na e momentonan aki.

Loke mannan Arubiano a crea cu simple plumanan, waya, hero, palo, tela y piedranan di color ta papia di un artisteria hopi avanza. E talento ta innegable, y e diseñadornan ta ocupa un lugar di preferencia den e gran perfecion logra cu especialmente e bodypiecenan Tampoco por pone un banda e vestuario, e colocacion di e piedranan di color, y payet, y tur loke ta briya, sin kita sombre pa esnan cu a usa nan talentonan pa crea combinacionnan sumamente atractivo.

Personalmente mi mester elogia Gerrit, esun cu mi a mira traha un di e bodypiecenan mas maraviyoso cu mi a yega di mira, sin subestima e otronan cu mi no conoce y no a mira crea nan obranan tampoco, te ora cu nan a pone nan riba caya como testimonionan di nan gran talentonan, di nan imaginacionnan yen di rikezanan creativo.

Ademas di bunita, e parada tabata grandi y a move bon, a pesar di algun inconveniente imprevisto. Esey sa pasa y ningun hende a sinti nan mes incomodo ora cu e parada a para na un solo lugar un poco dimas, loke tabata indicativo di algun problema mecanico o di generador. Pero, nan a ser supera den un tempo relativamente cortico y e gran exhibicion di color y alegria a sigui su rumbo pacta di antemano.

Un pabien personal ta bay pa e dirigentenan di SAC, pa esnan cu a guia e parada, y en especial, pa Cuerpo Policial, ocupa cu e dificil tarea di mantene orden publico durante e deroche di alegria cu a dura varios hora.

Carnaval ta uni nos como Pueblo, y e ta rekeri di cada un di nos un cooperacion incondicional pa e bon di nos isla y su pilar economico. Mi elogio (un biaha mas!) pa Ministro Otmar Oduber, kende tras di cortina a percura pa hopi facilidad.

No ta por nada cu nos tabata considere na Tivoli (hunto cu su difunto cuña, Lorenzo (q.e.p.d.) como e señornan di carnaval. Mi gratitud personal pa tur e telantosonan cu a brinda nos un espectaculo impresionante di alegria, musica y color durante tanto hora ayera tardi na Playa, mi ciudad natal, mi pida geografia personal riba e isla mas maraviyoso cu Dios a crea.