“Polis a hasi un set up contra mi cu droga, pero despues nan ta hasi manera nan no sa di e droga y esaki a desaparece”
Segun Alex Mathew,
*Mathew a bisa cu el a yama polis y nan a nenga di bin busca e heroina na su cas
ORANJESTAD(AAN): Mirando cu segun Alex y Liliana Mathew y nan abogado John Zara, O.M, fiscal y e sistema di corte henter no ta dunando nan un trato husto, nan a manda un protesta pa corte Europeo. Esaki relaciona pues cu e caso di Foxy Lady, cu despues di varios proceso den corte, ta bay sigui riba dia 22, 23 y 24 di Mei. Durante un conferencia di prensa Alex Mathew mes a trece dilanti cu for di prome cu e caso a bin dilanti, el a tende for di dos mucha muher Rusiano, cu a bisa algun otro mucha muher, cu nan ta bezig cu polis ta bin cu un set up pa hasi como si fuera Mathew ta bende y trafica droga.
“Ora cu e mucha muhernan a Sali for di e cas, nos a busca den e cas, pasobra nos tabata na altura di esey”. “Mi a yama polis despues pasobra en berdad nos a haya mey kilo di Heroina den mi cas”.
“Ora mi a yama polis pa bin busca e droga aki, polis a nenga di bin busca e droga y despues di un siman nan a bin aresta nos”.
“Mi a papia cu Huez Comisario Hak y nos a lage sa cu nos tin mey kilo di heroina ainda na mi cas den cushina y den pleno bista di polis, recherche y RST”.
Esaki segun Mathew kende a sigui bisa cu e Huez Comisario a lage sa cu nan no a detene pa droga y pa e no menciona droga.
“Te awe cu ta dos aña despues, mi no a wordo acusa di nada di droga, pues algo no ta klop”.
“Te awe nan no a haya e droga y mi no a wordo persigui pa droga”.
“Unda e droga a bay anto”, segun Mathew.
El a sigui bisa cu Huez Comisario aparentemente ta tapa cierto cosnan y pesey nan no kier pa e papia.
“Nan no kier a bin busca droga na mi cas y nan a tap mi telefon, pero nan no kier pa nos scucha e combersacionnan di tap mas, pasobra eynan bo ta tende con mi a bisa nan di e droga y di e set up di polis”, segun Mathew.
El a sigui bisa cu ta straño tambe cu peticion di parti di defensa pa scucha testigonan ta wordo nenga, siendo cu polis a scucha nan caba.
El a cuestiona tambe e hecho cu un di e hueznan a dicidi di no sigui mas como huez den e caso, pasobra e no ta sinti su mes ‘liber’. Mathew a bisa cu si e huez aki no sinti su mes liber, mihor e no ta huez mas.
