Baron Investment LCC ta perde caso di daño di peryiucio contra pais Aruba
ORANJESTAD (AAN): Manera ta conoci diaranson, 28 di maart huez a dicta setencia den e caso unda cu Baron Investment LCC a pidi huez pa prohibi pais Aruba di otorga e terenonan di ex Bushiri y sigui negocia cu Baron contra daño y herhuicio.
Baron Investment ta e grupo cu a keda na di dos lugar den e destaho cu a tuma lugar bou di e Gobierno anterior na aña 2007, y cu e actual Gobierno a purba di yega na un accuerdo cu nan pa loke ta trata Bushiri Hotel prome cu a bay na un destaho publico nobo.
Baron Investment a lanta e caso aki pa prohibi Gobierno pa otorga e tereno na otro grupo y pa obliga Gobierno pa sinta na mesa cu nan. Den e caso aki huez a dicta cu Baron Investment no tin ningun derecho pa obliga Gobierno y cu e proceso cu a worde hiba tabata uno habri y corecto.
Algun siman pasa Fresnos cu ta e grupo cu ken Gobierno anterior a negosha e reconstruccion di Bushiri tambe a perde nan di cuatro caso den Corte cu nan a lanta contra pais Aruba. Fresnos a conta cu sosten completo di Gobierno anterior unda cu hasta por bisa cu Minister di Turismo anterior a testigua contra di pais Aruba.
Den e forma aki y despues cu Baron Investment y Fresnos a perde nan caso den Corte, Gobierno por sigui cu negociacionnan pa e proyecto nobo di Bushiri.
E siman aki Minister Oduber ta ricibi for di e presidente di comision su conseho riba e dos gruponan nobo cu a keda te final pa loke ta trata adkisicion y operaccion di e ex Bushiri Hotel. Pa mita di e aña aki e ruinanan cu a worde laga atras door di e Gobierno anterior ta worde haci limpi y por mira un construccion cu ta bay tuma lugar pa por drecha e facilidad aki y pone back den e forma cu e tabata den pasado.
Minister Oduber su vision ta pa trece e exito cu Bushiri tabatin tempo e training centre tabata acopla na e hotel cu a duna e oportunidad pa hendenan por train ‘on the job’. Aruba ta bira un instrumento pa exporta e conocimento cu nos tin den ramo hotelero y e industria di turismo. Na e momentonan aki tin institutonan internacional cu ta interesa pa por haci esaki. Un di e condicionnan cu Minister Oduber a pone ta cu e compania nobo mester inverti un suma di 10 miyon Dollar den un training center riba e propiedad mes of otrolugar cu mester worde negocia.
Pa luna di september/october lo mester cuminsa cu construccion di e hotel nobo, cu ta contribui na un upgrading enorme di e bario y ta trece un cara completamente nobo pa e parti aki di Aruba cu prácticamente tur turista ta pasa.
