Castigo pa maestro Vito G.,
Acusa di comete actonan inmoral cu muchanan menor di edad, a keda mescos den corte superior
ORANJESTAD(AAN): recientemente Huez di corte superior a duna su veredicto den e caso di apelacion di e maestro si school Vito M.G.
V.G a wordo acusa di comete actonan sexual indebido cu un total di 4 mucha menor di edad. Algun den añanan 2006 y 2007 y otronan di 2008 te cu 2010.
Ta asina cu 1 di e casonan ta un caso den cual V.G a admiti su error.
El a admiti cu na dado momento el a duna un mucha muher menor di edad di su school un sunchi cu lenga.
Segun su abogado, el a asumi su responsabilidad y a admiti cu e tabata fout.
E mes a kita for di e school unda e tabata duna les y el a busca ayudo psiquiatrico.
Pa e caso aki el a wordo deteni riba 8 di September 2010 y Huez Comisario a lage bay dia 17 di September.
El a wordo acusa sinembargo di comete actonan sexual indebido cu 3 otro mucha muher menor di edad. E actonan ta inclui penetracion sexual y ehaculacion.
E lo a bay na cierto occasion cu un di e muchanan na e hoki di warda material, lagando e otro alumnonan den gym zaal. Eynan den e hoki di warda material e lo a tene relacion sexual cu un di e muchanan y e mucha muher a declara cu e no a sinti dolor, pero cu e homber a bin cla.
Segun abogado Edwin Duijneveld representando e acusado, su cliente for di un principio a para ariba fuertemente cu e no a comete e actonan sexual aki.
Su cliente a bisa cu si lo tabata berdad, e lo a admiti mescos cu el a hasi den e otro caso. Ademas di esaki e abogado a mustra riba un articulo di ley cu ta bisa cu solamente declaracion di un victima no ta suficiente pa yega na un condena di hende.
El a bisa cu mester tin evidencia suficientemente convincente banda di esaki, pa por yega na un condena. E hecho cu mayornan ta declara loke e yiunan a bisa cu a pasa no por wordo considera extra evidencia.
Mescos ta conta pa loke e maestronan di school a trece dilanti den e caso aki.
E abogado a bisa cu no ta cla si e mucha muhernan kende a bin cu e acusacionnan despues di algun aña, a hasi esaki pasobra nan a corda algo, of cu nan a proyecta algo di otro experiencianan, riba acusado V.
Di e tres mucha muhernan, e prome denuncia a wordo hasi riba 9 di November 2010 pa tata di un mucha muher cu ta bisa cu e sa cu recientemente V.G lo tabata envolvi den un caso unda cu e lo a sunchi un menor di edad den boca.
Riba dia 15 di November 2010 mama di un di e mucha muhernan a entrega un denuncia na polis contra V. y riba dia 26 di November 2010 mama di e tercer victima a bay entrega su denuncia na polis.
Esaki despues cu el a tende for di Lisette Gomez di Fundacion Lisette Gomez y un maestra di school, cu su yiu a wordo mishi sexualmente pa V. kende lo tabata envolvi den otro casonan di abuso di menor.
Esaki segun Duijneveld, kende a cuestiona e forma di proceder di Fundacion Lisette Gomez.
El a bisa cu ta logico cu e fundacion ta bisa e señora pa e bay polis pa denuncia e hecho, pero e fundacion a bise tambe pa e bay prensa mesora pa conta tur cos.
E abogado a bisa cu despues di e prome incidente unda cu V. a admiti cu el a sunchi un menor di edad, e fundacion a cuminza kibra nomber di V. y nan a bisa cu mas victima lo bin dilanti.
E abogado a haya cu e caso a wordo influencia mucho hopi pa un tercer partido. Segun Duijneveld, e maestra kende a bin dilanti pa denuncia e caso, for di un principio caba a saca su conclusion y a cuminza anda cu sra Lisette Gomez di e fundacion.
“E fundacion aki aparentemente no ta busca e berdad, sino su meta ta pa prome cu un persona wordo declara culpabel, lo mas posibel daña su nomber y pinte preto”.
“Un fundacion asina lo mester atende cu e interesnan di e victimanan y laga medionan di comunicacion pafo di esaki. E abogado a bisa cu e ta lamenta cu huez no a duna e permiso pa e por hasi pregunta na e fundacion, pa haya sa entre otro con e fundacion a wordo envolvi den e asunto aki.
Duijneveld a trece dilanti cu ta e maestra kende a pidi tur mucha di su klas pa bisa si nan a wordo abusa pa V.G, ta esun cu lo a envolve e fundacion.
E abogado ta haya cuestionable con supuestamente e muchanan lo a corda loke a sosode cu nan. El a bisa cu no ta asina cu diripiente nan a cuminza corda loke a sosode, sino despues cu nan a wordo stimula pa purba corda algo cu lo por a sosode.
E abogado a cuestiona cierto comportacion di algun di e victimanan, cu otro maestra a trece dilanti. Entre otro cu un di nan lo tabata na cas cu un amiga y nan lo a laga un primo mishi cu nan sexualmente.
E abogado a puntra su mes si e mucha lo a proyecta loke el a pasa aden cu su primo y bisa cu ta V.G. Un maestra lo a declara tambe cu tabata tin un incidente den pasado, unda cu dos di e muchanan inhustamente a acusa un persona di a mishi cu nan sexualmente.
E caso ey mes a wordo soluciona pa V.G y cabesante di e school, unda cu a Sali na cla cu e mucha muhernan a inventa e storia. Mirando tur esaki, e abogado a pidi huez pa declara su cliente liber di tur acusacion.
Fiscal a exigi un castigo incondicional di 4 aña y pa V.G wordo prohibi durante 5 aña, di eherce trabao di maestro di school. Despues di algun siman huez di corte di prome instancia a duna su veredicto y a condena V.G pa solamente e acto cu el a admiti, cu ta cu el a sunchi e mucha menor di edad.
Pa esaki el a haya 300 dia, di cual e 26 dianan cu el a sinta ta incondicional. E resto mester a colga riba su cabez como castigo condicional.
Banda di esaki e huez e tempo ey a dicta cu pa dos aña largo Vito G. no ta wordo permiti di ta maestro si school. Ministerio Publico no tabata di acuerdo cu e sentencia y a dicidi di apela.
Despues cu e caso di apelacion a wordo trata riba dia 12 di Maart, hueznan di corte superior a dicta cu e castigo ta keda mescos cu den corte di prome instancia.
Despues cu e mucha muhernan a bin dilanti, V. a wordo deteni dia 1 di December y te ainda e ta den KIA.
