Comunicado di Ministerio Publico, relaciona cu caso contra e Marinier Hulandes na stuur di e auto den cual dos otro marinier a fayece
ORANJESTAD(AAN): Diabierna DIARIO a ricibi un comunicado di prensa di Ministerio Publico, relaciona cu e accidente riba 9 di Maart, den cual dos Marinier a perde nan bida cerca di Mahuma. Ministerio Publico den su comunicado ta bisa cu nan a traha e comunicado basa riba locual a sali den prensa Hulandes pa loke ta con e Marinier cu ta deteni ta wordo trata y calidad di e prison di KIA. O.M ta splica cu dia 9 di Maart entre 10.30 y 1’or di anochi e accidente a tuma lugar riba e caminda di San Nicolas pa Playa cerca di Mahuma.
E accidente a tuma bida di dos marinier Hulandes, mientras cu un otro a wordo herida seriamente.
Chofer di e auto tambe un marinier, a haya heridanan leve y a wordo interna solamente algun dia den hospital.
E accidente a sosode ora cu e auto den cual e 4 mariniers tabata core a dal den un heki banda di caminda.
KPA y Marechausee di Reino ta investigando e causa exacto di e accidente.
E chofer ta wordo acusa di a core na un manera hopi insigur bao di influencia di alcohol.
Ta wordo sospecha cu el a bay pasa auto na un parti di e caminda cu esaki ta prohibi y posiblemente cu velocidad mucho halto.
Ademas di esaki e chofer tabata core sin seguro y cu e plachi di number robez.
El a wordo deteni pa Marechausee di Reino (KMAR) y ta den detencion preventivo na KIA, wardando su caso bin dilanti aki na Aruba.
E siman aki su detencion a wordo prolonga cu 90 dia, door di Raadkamer di corte Militar.
A base di e buki di e codigo penal Militar, e corte militar di Aruba tin hurisdiccion den e caso aki.
Esaki ta nifica cu lo uza ley militar di Reino Hulandes durante tratamento di e caso.
Aruba tin un corte militar igual na esun di Arnhem.
Pa loke ta e circumstancianan di e detencion, e sospechoso ta deteni na KIA y ta comparti su cel cu dos otro preso.
E ta ricibi cuido adecuado incluyendo su cuminda na ora y cuido medico y mental.
Frecuentemente e ta ricibi bishita di e pastoor di kazerne.
E docter di KIA kende tin contacto tambe cu e docter di kazerne, ta ofrece e sospechoso e cuido medico. E comunicado di O.M a finaliza bisando cu e calidad di KIA ta cay bay di e reglanan Europeo.
Si e ta cumpli cu e reglanan ta wordo monitoria pa CPT (Committee for Prevention of Torture and Inhuman Treatment or Punishment), cu ta un comite independiente di Conseho di Europa.
stanisluv
E polis tambe mester cambia nan sistema pensando, cu
tur europeo na Aruba ta comporta nan mes den ordo.
Nan ta bebe y stur tambe y nan uso di droga ta inclui pildo
manera xtc y otro. Ta Dios a preveni cu otro auto no tawata
involi den e desgrcia aki. Triste pa e henter caso.