E buki di Mito Croes y e caminda recori pa yega na Status Aparte

Publication: Tuesday, 13 March 2012. Categoria: Editorial,General

             Lastima cu mi no a trece a buki di Mito cu mi na Miami pa mi cita directamente for di dje, pero mi a lese na Aruba y a disfruta enormemente di su lectura. Ki ora cu un buki ta bon skirbi, cu e ta profundiza den e materia cu e ta trata, y pa cual e autor ta haci e investigacionnan di rigor prome cu emiti huicio, o por lo menos presenta e factornan historico incuestionable pa e lectornan mes formula nan huicio, bo mester kita sombre pa un trabao bon haci. Mito, den esey, a cumpli cabalmente cu e reglanan di un buki serio, presentando tur e citanan necesario y nan fuentenan corespondiente, pa duna e credibilidad necesario na loke e ta exponiendo.
Hopi hende no ta gusta ser presenta cu hechonan cu nan a troce o sconde durante hopi decada, pa crea un distorsion di e realidad cu a tuma lugar, pa djey zapatea ora cu nan ser resumi cu tanto acierto den un buki cu ta nara e berdad historico cu hopi di nos a biba, pasobra no ta trata di un historia antiguo, sino di uno cu a toca por lo menos mi generacion biba. Na ningun caminda den e buki mi a nota cu Mito a trata di aminora e importancia di Betico o di MEP den e realizacion final di Status Aparte, pero si a tuma e tempo necesario pa traza e origen di e lucha te temponan basta anterior na nan. E logro final di Status Aparte mi ta adscribi na Betico dia cu el a dicidi di dera e hacha cu e partidonan contrario, a atrae clero, sindicato y comercio pa forma parti di su team y acompañe te Hulanda, unda e decision a cay pa duna Aruba un Status Aparte dentro di Reino.

         Pero, no ta Betico a inicia e lucha; diferente politico di envergadura cu tabata tey prome cune a bin cu e idea o proposicion. Mirando e lucha den su totalidad, ta pakico mester sconde e nomber di otronan cu a inicia e lucha, a contribui na dje, of a amplifike di tal forma cu nan contribucion a ser recogi den e paginanan di nos historia reciente?

           Poniendo mi memoria den accion, mi ta corda e lucha hopi bon, especialmente e añanan turbulento cu a conduci na un logro su no tabata esun cu Betico, MEP y nos tabata buscando. Den ningun momento mi a scucha cualke un di e politiconan activo e tempo ey den e lucha menciona Status Aparte un solo biaha. E lucha di MEP y Betico tabata pa e Independencia total di Aruba, no un status intermediario. Betico a manda hopi emisario den exterior cu cartanan solicitando ayudo pa logra e Independencia di Aruba. Un trio a bay hasta Cuba cu e mision di pidi e ayudo Cubano pa logra loke e cabezantenan di e lucha e tempo ey tabata buscando, o sea e Independencia di Aruba. Diferente carta a bay pa Nacionnan Uni exigiendo e derecho di autodeterminacion di Aruba.

              Mi ta corda cu mi a acompaña Betico, Nel y Remie Zaandam te Costa Rica, unda nos a reuni cu Presidente Monge pa explora su disposicion di yuda den e lucha cu tabata tumando lugar pa logra e Independencia di Aruba. Otro cu a ser acerca den diferente ocasion pa contribui na e lucha tabata e Presidente di Venezuela, Carlos Andres Perez, kende habilmente a sa di saca curpa di cualke compromiso cu por a pone den dificultad politico o diplomatico cu Hulanda. Y pa confirma cu e lucha di MEP y Betico no tabata pa Status Aparte sino pa Independencia, e ultimo carta di Betico cu nos a publica den DIARIO tabata hopi explicito pasobra e tabata bisa cu nos a logra e prome paso den e lucha pa Independencia, o sea Status Aparte, pero cu tabata falta awor e cumplimento final di e lucha: Independencia.

               Loke mi no ta compronde ta pakico awor tanto beheit pasobra a sali un buki bon hinca den otro di un berdadero profesor Arubiano, o sea Mr. Mito Croes, kende a tuma hopi tempo y esfuerzo pa resumi, cu citanan y fuentenan historico autentico, e caminda recordi den e lucha pa Status Aparte for di su momentonan incipiente te su logro final. Mi no a mira den e buki di Mito ningun postura personal cu e por a asumi pa faborece cualke figura politico di su preferencia, y ta hopi satisfecho cu un relato historico imparcial, bon documenta y historicamente incuestionable.

One Response to 'E buki di Mito Croes y e caminda recori pa yega na Status Aparte'

  1. March 18, 2012 at 11:48 am
    un arubiano

Leave a Reply