FCCA, un actor importante den proyecto ‘living lab’ di TNO Caribe

Publication: Tuesday, 6 March 2012. Categoria: General

ORANJESTAD(AAN):FCCA ta un di e actornan importante ora ta papia di desaroya un ‘living lab’ na Aruba loke ta e proyecto cu TNO Caribe ta prepando pa cuminsa cu ne. Ya e prome symposio riba e tema aki a tuma lugar cu e stakeholdernan cu ta forma e grupo fiho di trabou pa hiba al cabo e proyecto interesante aki. Sr.Jose Paula di FCCA hunto cu director sr.van Poppel tabata participantenan na e prome symposio di TNO Caribe. Un ‘living lab’ den e caso aki ta un bario cu ta haci uzo di energia sostenibel so. Pa logra esaki ta trece hunto y envolvi stakeholdernan manera empresanan di utilidad. Un living lab tin un balor potencial pa e sociedad y ta habri caminda pa inovacionnan.
Sr.Paula “E grupo aki ta consisti di mayoria di companianan di utilidad hunto cu representantenan di TNO Caribe y FCCA. Loke nos a acorda ta cu pa e siguiente lunanan nos ta bay sinta den un grupo nucleo pa yega na conclusionnan concreto riba e ‘living lab’ cu nos tur ta masha interesa pa traha riba dje”.

Mas aleu sr.Paula a splica cu e contribucion di FCCA den e proyecto aki ta cu nan ta bay percura pa bin cu mas o menos 25 cas pa desaroya nan den un becindario completamente sostenibel.

“Aki mester ayudo di tur e otro stakeholdernan cu awe a mustra nan disponibilidad pa participa den e proyecto aki.

E idea tras di esaki ta pa wak kico ta e factornan cu mester tuma na cuenta ora bo kier reduci e uzo di energia dor di trece proyectonan sostenibel pa comunidad”. Sr.Paula a bisa cu loke a sosode na Juwana Morto ta mas o menos e idea di un ‘living lab’ cu a bay den cooperacion cu ELMAR cu a percura pa e stripnan solar riba e daknan despues cu FCCA a renoba e casnan completamente.

“E habitantenan awor tin beneficio di dje, pasobra tur loke ta spar na coriente ta bay bek pa e habitantenan”. Dia 7 di mart fase dos di Juwana Morto ta continua. Den fase tres ta completa e proyecto. Jose Paula “Awe nos a haya hopi informacion balioso for di diferente punto di bista cu nos mester bay traha riba nan.

E punto importante cu a conclui na final di dia ta cu tur partido ta disponibel pa yega na un meta final. Pa mi esaki ta e exito di e symposio aki”.

Leave a Reply