Fiscalnan a troce declaracionnan na fabor di O.M y polis a ofrece testigonan placa y promesa pa declara contra sospechosonan den caso di Foxy Lady
Segun abogado John Zara,
ORANJESTAD(AAN): Diahuebs abogado John Zara a yama un conferencia di prensa, pa e papia tocante un caso di su clientenan Alex y Liliana Mathew, kendenan a wordo acusa di entre otro traficacion humano, labamento di placa y maltrato. Zara a cuminza na bisa cu for di tempo cu el a tuma e caso aki over for di otro abogado y e tabata bay corte, el a ripara cu tabata tin hopi interes pa e caso aki.
Sala di corte tabata yen, unda cu te hasta huez y fiscalnan cu no tabata atende e caso tabata bin sinta den e sala. Medionan di prensa tambe tabata tey.
Sinembargo Zara a bisa cu ultimo biaha cu el a bay corte hunto cu abogado renombra Bram Mozscowicz, el a ripara cu sala di corte tabata bashi, pa continuacion di tratamento di e caso yama ‘Strea’.
El a bisa cu e caso no tabata tin atencion mas di huez, fiscalnan of prensa, manera den comienzo di e caso. “Despues mi a bin compronde cu prensa no a wordo avisa di e fecha di tratamento di e caso”.
“E caso pues a tuma lugar dia prome di Februari sin prensa”.
Esaki segun Zara kende a sigui bisa cu durante tratamento di e caso el a nota cu tabata tin un huez nobo pa e caso. Mirando esaki el a hasi varios peticion cu el a haci caba anteriormente y el a bin cu algun mocion nobo.
El a sigui nota cu no tabata tin interes. Segun Zara Griffier no tabata skirbi nada y na cierto momento huez a cera e session y a bisa cu e ta bay duna un decision riba locual a wordo pidi, mas despues.
Un siman despues e decision di huez a cay y practicamente tur e peticionnan a wordo nenga. “Nos tin un presentimento grandi cu nan no kier papia mas di e caso aki y pesey mi a yama e conferencia di prensa aki, pasobra e caso aki ta uno hopi importante”.
“Hopi placa di pueblo a wordo uza y mi ta haya cu pueblo tin e derecho di haya sa kico ta pasando den e caso aki”. Esaki segun Zara kende a bisa cu e ta kere cu O.M tin motibo di no kier papia tocante e caso aki mas.
El a sigui bisa cu Ministerio Publico despues di e cera e acusadonan, a bay rond mundo pa busca testigo. “Ora cu nos a pidi e prome huez den e caso aki pa nos tambe haya e derecho pa tende e testigonan, nos a tende nan declara cosnan na fabor di mi clientenan”.
“Hopi cos no a bay bon pa loke ta e testigonan”.
Esaki segun Zara kende a bisa entre otro cu varios testigo a declara na fabor di su clientenan y e testimonionan ey no a wordo poni riba papel.
El a bisa tambe cu tin algun testigo cu el a yama cu no tin nada malo di papia di e pareha Mathew, sinembargo e fiscal y deurwaardernan ta bisa cu nan no por logra localiza e testigonan aki.
Fiscal si a scucha e testigonan y fiscal a troce nan declaracionnan.
Segun Zara, e manera con e testigonan a wordo acerca y confronta pa polis no ta legal. Nan a wordo ofreci placa, of wordo priminti cierto cosnan, segun Zara.
