ORANJESTAD (AAN): E barco di Marina Hulandes den area di Caribe, Hr.Ms. Amsterdam, a bay rescata un barco y su tripulante di seis persona. E barco tabata drief debi cu el a confronta problema cu motor, y pa siete dia a keda pasa den situacion na man di laman bruto.
Riba su prome dia di patruyahe den Laman Caribe, ya caba Hr.Ms. Amsterdam por a demostra su balor, ora cu e informe a drenta cu tin un barco cu problema. Ta trata di “Heir Majesti”, un barco di carga procedente di Georgetown (Jamaica), cu tabata riba ruta procedente di Guyana. Te despues di siete dia porfin e capitan por a pidi yudanza di Guardacosta.
E barco chikito a cuminza drief panort di Bonaire. Mesora e helicopter Lynx di abordo a bay pa e barco. E avion di patruyahe Dash-8 tambe a worde manda. Ora cu a localiza e barco, e helicopter a haci entrega di awa pa bebe.
Ora cu e barco Hulandes a yega cerca, mesora un team di observador a bay abordo, bao guia di e prome oficial, y hunto cu nan specialistanan medico y tecnico. Nan a haci entrega di cuminda y bebida na e tripulantenan pa algun dia.
E tripulantenan tabata hopi contento cu yegada di e Hulandesnan, y como cu e motor no por worde drecha riba laman, a dicidi na lastra e barco rumbo pa Bonaire.
