Juan David Yrausquin: Mi NO por sostene e presupuesto aki

Publication: Saturday, 17 March 2012. Categoria: General

ORANJESTAD(AAN):E cuadro financiero cu a acorda na un principio no ta locual a keda presenta durante e votacion pa presupuesto 2012. Cu esey den mente, Parlamentario Juan David Yrausquin di fraccion di AVP a anuncia durante “stemmotivering” cu e lo no sostene e presupuesto di su mesun Gobierno. Cu esaki, e voto di diabierna marduga ta bay den historia. Juan David Yrausquin a bisa di ta consciente di esaki tambe, specialmente pa motibo di e cultura politico riba nos isla.
E Parlamentario mas hoben den Parlamento a motiva su voto bisando cu a acorda desde un principio cu Gobierno lo atene su mes den e cuadro financiero, pero cu awor no ta cumpliendo cu esey. Ta pesey Yrausquin no por mira con e por sostene e maneho di su mesun Gobierno. Ora referi na e cuadro financiero, ta referi na e plan di reduccion di deficit cu Gobierno a presenta y Parlamento a aproba na aña 2010.

Segun e cuadro financiero aki, e deficit di presupuesto di e aña aki lo mester ta 250 miyon florin. Segun e Parlamentario, e deficit awor ta 310 miyon florin basa riba proyeccionnan di crecemento economico di Gobierno, cual ta mas halto cu esun di Banco Central.

Separa di e aspecto financiero di e presupuesto, tin mas asunto cu no ta carga e aprobacion ni sosten di e Parlamentario. Ta referi aki na e hecho cu su fraccion ta aproba e maneho di ex Minister Marisol Lopez relaciona cu expansion di cantidad di camber di hotel.

Durante Aruba 2025 a saca afo cu si Gobierno honra tur e peticionnan bieu pa bin cu mas camber di hotel, anto na aña 2025 nos isla lo conta cu 175 mil habitante, siendo cu si baha e cantidad existente cu 2 mil camber, cu nos lo crece te na 125 mil habitante so.

Den e mocion presenta na Parlamento ta papia di “temporisa” e maneho, locual ta habri espacio pa Gobierno duna permiso pa construi mas camber cu e proyecto di Bushiri Hotel, pero pa cual e Parlamentario ta teme cu esey e lo por crea oportunidad pa amplia otro hotelnan y sigui cu otro proyectonan pendiente.

Riba dje, Juan David Yrausquin ta haya cu riba otro terenonan Gobierno lo por haci mas pa sigura oportunidad igual pa tur nos ciudadanonan. Ehempel di esaki tin hopi, den unda e ta haya cu algun grupo of persona tin mas ventaha cu otronan.

E hecho cu un Parlamentario di AVP no ta sostene e presupuesto y maneho di su mesun Gobierno, ta habri espacio pa lanta e interogatorio si e lo sigui den e fraccion y si e lo sigui sostene e Gobierno den e aña presupuestario cu ta sigui.

Ironia di bida ta, cu for di oposicion mes a bin sosten pa e mesun presupuesto aki. Por lo menos 3 fraccion den oposicion, esta PDR di Andin Bikker, Drs. Mervin Wyatt Ras y Drs. Marisol Lopez Tromp a anuncia di trempan cu nan SI lo sostene e presupuesto 2012 di Gobierno.

Leave a Reply