Diario Online

Mama ta sinti cu e criatura a wordo neglisha pa e chofer, ambulance y docter Daza na Polis

Publication: Saturday, 31 March 2012. Categoria: General

Mucha a sufri golpi den accidente di bus escolar:
ORANJESTAD (AAN) – Diabierna ultimo pa 1.30’ or di atardi, a sosode un accidente di trafico na momento cu un unidad di Arubus escolar a box cu un auto di famia, y varios mucha a haya golpi.
Na redaccion di DIARIO a presenta un mama Maisula Gonzalez, cu su yiu Fabricio Toyo, cu ta un di e muchanan di school pasahero di e bus S-12. E mama a declara cu dos ambulance a bin na e lugar pa atende e pasaheronan di e auto particular, pero nan no a brinda e muchanan ningun control, siendo cu algun di nan tabata keha di dolor den algun parti di nan curpa. E chofer di e bus escolar, cu segun e hobencito a bisa den nos redaccion ta djis a pidi un otro bus y a subi tur mucha pa djis nan bay cas, sin a preocupa mes con nan condicion ta.
Fabricio a dal riba e hero di e stoel y tabata sinti dolor na su neck y no por a habri su wowo banda drechi. Un dama cu tabata coriendo riba e ruta na momento cu e muchanan a baha pa subi otro bus, a mira cu Fabricio ta mustra malo, cu e no por move su neck y cu tampoco por a habri su wowo.
El a pidi personal di ambulance pa hiba e mucha na Eerste Hulp, pero esaki a wordo nenga, anto di su mes iniciativa a hibe na “Quality Chiropractic Clinic” na Wayaca, unda e hobencito a wordo yuda pa docter Roga. E tratamento aki e mama mes a paga, siendo cu cada un mucha cu tin carchi di Arubus ta asegura y esaki kiermen cu Arubus mes tin cu para responsable pa cualkier gasto medico den caso di accidente.

Docter Roga a skirbi riba blachi cu e ta supone cu e mucha por tin un fractura pasobra su neck tabata stijf y e no por a habri su wowo, loke e ta kere ta debi cu e golpi a afecta un nervio. El a aconseha e mama pa hibe Eerste Hulp na Hospital Horacio Oduber pa nan saca potret.

E mama, logicamente hopi preocupa a hiba e yiu na servicio di emergencia, pasobra e tabata keha tambe di hopi dolor di cabes. Aki el a wordo atendi pa docter Daza Rafael, ken a bisa cu e mucha no falta nada, y a nenga di mande saca potret, y a expresa cu dr. Roga no sa nada!

Ora e mama a mustra su preocupacion e docter a rabia y a puntre si e ta docter y si e ta desconfia di dje. E mama a bise cu e no ta desconfia di dje, pero cu e mester compronde cu e ta preocupa pasobra su yiu ta keha di dolor di cabes y no por habri un wowo. El a bise cu esey ta debi na e golpi y a dune un receta di Paracetamol (e remedi magico na Aruba).

E mama ta hopi indigna y mas ora e ta lesa den corant cu hopi ta wordo haci pa mehora e servicio di Poli y di hospital en general, locual e no a ripara mes ni sikiera pa yuda un mucha, esta su yiu!
E mama ta sinti cu su yiu a wordo neglisha tanto pa e chofer di Arubus como pa ambulance y e docter na Poli.

ARUBUS:

DIARIO a tuma contacto cu un funcionario di Arubus ken a confirma cu e muchanan cu ta haya transportacion den bus escolar ta asegura contra accidente. El a aconseha pa e mama bay cerca señora Diana Kock di Arubus cu e caso aki. Lo ta bon si tin mas mucha cu a haya golpi y cu podise ta keha di algun dolor, pa nan tambe bay cerca sra. Kock cu e situacion aki.