Marinier di accidente fatal kier pa e wordo huzga na Hulanda
ORANJESTAD(AAN): Abogado mr. Chris Lejuez den un declaracion duna a splica cu e ta representa e Marinier Hulandes kende ta deteni relaciona cu e accidente fatal na crusada di Mahuma, caminda dos di su coleganan a perde nan bida.
Den e accidente aki di dia 9 di maart, un di e fayecidonan tabata alabes un bon amigo di dje. Segun e Abogado a splica, defensa ta sali for di punto di bista cu aki ta trata di un caso Hulandes cu mester wordo trata door di un Hues Hulandes. Den leynan tin un excepcion pa militarnan. Y ta agrega cu tur militar Hulandes na mundo, ta cay bou competencia di Hues y Leynan Hulandes. Y aki na Aruba tambe tin un camber militar, caminda ta trata e casonan aki. Recientemente, segun mr. Lejuez a splica, Fiscal a pidi prolongacion di e marinier aki.
Normalmente e procedura aki na Aruba ta cu ta bay gevangenhouding pa 60 dia. Pero bou di ley Hulandes e maximo cu fiscal por pidi ta 90 dia. Durante e sesion pa prolongacion di su detencion, defensa a trece dilanti cu e Marinier ta desea di wordo huzga na Hulanda, pasobra e ta cay bou di ley y hues Hulandes. Si esey no ta posibel, el a pidi pa su caso wordo trata mas liher posibel, y sinta su castigo na Hulanda, caminda tur su famia y amigonan ta biba.
Pa loke ta e caso mes, a wordo splica cu no ta nada inusual cu Ministerio Publico di Aruba ta busca ayudo di expertonan Hulandes den casonan di accidente di trafico. Den e caso aki ta masha importante, segun fiscal, pa haya sa con duro e sospechoso aki tabata core na momento di e accidente. Na Aruba no tin e expertonan aki, pa cual a manda pidi ayudo na Hulanda.
Defensa a trece dilanti cu nan ta di acuerdo pa e caso aki wordo husga na Hulanda, no solamente pa e motibonan ariba menciona, pero tambe tur e persona involucra ta militarnan Hulandes-Europeo. Famia di e victimanan cu lo kier ta presente durante tratamento di e caso, tambe ta biba na Hulanda. E lo ta un bentaha pa tur e partidonan directamente envolvi.
Ademas esnan cu a traha e rapport tecnico ta Hulandes, y si Hues haya necesario pa scucha nan atrobe, ta facil pa nan presenta ya cu nan tambe ta biba na Hulanda. Fiscal di su banda a bisa bon cla cu aki ta trata di un accidente cu a tuma lugar na Aruba y mester wordo husga, manera cualkier otro caso, na Aruba.
E caso aki su indole a trece basta confusion pa cual e Abogado a splica cu e Fiscal cu ta atende e caso aki berdad ta uno Hulandes, pero ta un fiscal di Aruba. E trabou tecnico enberdad a wordo haci door di expertonan di trafico cu a bini for di Hulanda. Marechaussee tabata envolvi, pasobra e sospechoso tabata cera den localidad di Marinierskazerne y interoga eynan, nan tabata encarga cu su transporte di KIA pa Kazerne y Corte. Aworaki e ta wordo trata mescos cu cualkier otro sospechoso, y transporta door di CEA.
Tabata tin varios rumor den pueblo cu e mesun Marinier aki algun dia prome tabata envolvi den un accidente riba Sasaki caminda un auto a bolter. Mr. Lejuez a bisa cu e tambe a tende e cos aki y a combersa cu su cliente, kende ta nenga totalmente di tabata envolvi den un otro accidente. Loke si el a tende tabata cu un di e personanan cu a perde su bida, tabata involucra den e accidente riba Sasaki. Pero e no sa di ki forma.
Hopi hende no ta conoci cu e camber militar na Aruba, cu ta existi pa hopi aña. Pero e ta consisti di dos Huez di Aruba mas un militar di un posicion hopi halto. Nan ta huzga e casonan. Den su presentacion dilanti Corte Militar, e hoben Marinier a expresa di ta lamenta masha hopi loke cu a pasa. E ta desea cu e por ta na Hulanda pa e contact famia di e victimanan. Y a bisa cu un di e fayecidonan ta su miho amigo.
