Necesidad ta grandi pa sanger di tipo A y B positivo y negativo ademas di AB y O

Publication: Monday, 26 March 2012. Categoria: General

Hefe di Banco di Sanger Raymond Maxwell:
ORANJESTAD (AAN) – Den un entrevista cu Matutino DIARIO a realiza cu señor Raymond Maxwell, Hefe di Banco di Sanger, el a mustra su aprecio pa e tipo di iniciativanan manera esun di fraccion di AVP di a bay registra pa nan bira donante. Señor Maxwell a señala cu cada un donante cu bin na Banco di Sanger ta hopi bon bini pasobra e necesidad ta sigui crece, y semper e tiponan di sanger cu mas necesidad tin di nan ta A positivo (+) A negativo (-) B + y B- y logicamente tipo AB y O.
El a splica tambe cu despues di a haci e yamada na comunidad, e prome siman e reaccionnan tabata hopi halto, pero despues a cuminza baha segun e dianan ta pasa. Esaki ta nifica cu tin momentonan pick cu respuesta halto pero despues ta bolbe disminui.

Señor Maxwell kier haci un yamada na pueblo atrobe, pa nos ta conciente di con importante ta pa duna sanger y no keda warda te ora Banco di Sanger haci peticion via prensa pa nan bira conciente di e necesidad aki.

Señor Maxwell a comenta cu netamente e sanger cu nan mester ta esun cu no ta drenta na momento cu nan ta haci e peticion, pero nunca a yega asina leu cu no tin sanger ora cu Hospital mester. El a reitera cu e tiponan A y B ta esnan cu mas tin mester di dje, pero tambe cu tipo O positivo nan por yuda otro.

Ta berdad cu Banco di Sanger tin su reserva, no obstante semper nan mester ta diez paso dilanti, pasobra nunca por bisa Hospital cu e banco no tin sanger. Pa no yega asina leu, nan ta pidi pueblo pa bin registra. Señor Maxwell a agrega cu Banco di Sanger ta hopi proactivo aworaki y esaki ta bayendo bon y nan ta trahando na un manera responsable.

Aunke Banco di Sanger por atende di 28 pa 30 donante pa dia, e meta ta pa haci esaki na un manera organiza y pa tal motibo nan standard ta di 25 hende pa dia. Sinembargo, e ultimo dianan nan ta hayando un average di 27 pa 28 donante pa dia, y esaki ta causa stress pa e personal y e donante, cu mester warda largo rato.

Señor Maxwell a indica cu generalmente nan ta traha cu cita y si nan por tuma 15 persona pa dia e ta bay hopi lihe, pero si tin entre 28 pa 30 donante tin un tempo di spera, mientras cu nan ta respeta e tempo di e donante cu tin cu ausenta di su trabao of laga trabao di cas un rato pa bin duna sanger. Esaki ta algo cu Banco di Sanger ta aprecia y duna su balor inmensamente.

Den otro articulo nos lo elabora riba e rekisitonan pa ta un donante y cuanto biaha pa aña ta adecua pa un hende duna sanger.

One Response to 'Necesidad ta grandi pa sanger di tipo A y B positivo y negativo ademas di AB y O'

  1. September 10, 2012 at 10:50 pm
    Jackelin Echeverri

Leave a Reply