Pa subi sala di parto awor mester di cita
Dr. Horacio E. Oduber Hospital
ORANJESTAD (AAN): Na Aruba, Hospital tin diferente tarea y deber y un di e tareanan primordial ta garantisa e siguridad, privacidad y bienestar di cada pacient cu ta worde admiti. Pa por garantisa e siguridad, privacidad y bienestar di cada pacient Hospital ta sigui cierto procedimentonan pa asina preveni situacionnan cu lo por trece den peliger e siguridad di e pacient y tambe di e bishitante.
Aki DIARIO ta trece procedimentonan necesario pa bishitantenan pafo di ora di bishita:
1. Carnet di entrada cu codigo di color
E Carnet aki ta worde otorga na e bishitante cu un validez di maximo 1 dia ora cu un pacient ta acudi na por ehempel Departamento di oncologia, Cuido ambulante y tambe Sala di parto. Pa por haya acceso ta necesario pa e bishitante pasa cerca un miembro di Personal di siguridad staciona net dilanti di lift na entrada principal di Hospital na unda lo tuma contacto cu e departamento concerni pa pidi permiso pa otorga e Carnet di codigo di color. Cada color ta identifica e departamento cu bo ta bishita.
2. Carchi di bishitante
E carchi aki ta worde otorga na bishitante cu un validez maximo di 9 dia na momento cu un pacient ta hopi malo y mester di cuido di famia y tambe si bo yiu ta un pacient na Departamento di mucha. Pa haya e Carchi di bishitante ta necesario pa a papia cu e departamento concerni prome cu pasa cerca e Personal di siguridad pa asina nan ta na altura di bo situacion. Na momento cu tur cos ta regla lo bo ricibi di Personal di siguridad un Carchi di bishitante. Pa cada pacient ta otorga 2 carchi di bishitante cu nomber, fam y adres di e bishitante. Tambe ta nota e dia cu a otorga e carchi te e dia cu e ta caduca. Pafo di oranan di bishita ta necesario pa identifica bo mes cu e carchi di bishitante aki y un ID valido.
Na momento cu sosode un accidente inespera y alavez bastante grave Hospital siguramente tin comprension pe situacion y pa es motibo lo permiti pa 4 persona compaña su ser keri den Sala di espera di operacion. Esaki ta solamente den casonan extremo y despues cu Personal di siguridad a consulta cu e Hefe di departamento di Siguridad di Hospital.
Hospital ta pidi encarecidamente pa cada bishitante tene bon cuenta cu e procesonan aki mirando cu e ta pa e bienestar, siguridad y privacidad di cada pacient cu ta worde admiti den Hospital. Tambe ta importante pa recorda un y tur e oranan di bishita cu ta di 11.30 di mainta te cu 1or di merdia. Tambe por pasa bishita entre 6or di atardi te cu 8or di anochi. Pa e departamento di Cuido intensivo y Medium Care por bishita entre 12or pa 1or di merdia y 7or pa 8or di anochi. Pa por subi bay Salanan di Parto mester traha un cita.
