Presidente di Parlamento drs. Paul Croes cu mensahe na trahadornan/contratistanan di Valero;
ORANJESTAD(AAN):No ta prome bes cu Aruba y Arubianonan ta haya nan mes den un situacion delicado asina. Desde cu Valero a hasi e anuncio di e suspension di operacion, e noticia aki a sa di domina e esfera politico, pero tambe den comercio por sinti e intranquilidad. “Mi mensahe central pa henter nos comunidad, incluyendo comercio, pero en particular na e trahadornan di Valero y e contratistanan den servicio di e refineria ta; Arubianonan semper a sa di sali dilanti, den situacionnan dificil. Mi a tuma nota di un esfuerzo grandi di parti Gobierno di Aruba pa logra yega na un solucion a corto plazo riba e situacion aki. Parlamento na su banda, tambe mi persona como Presidente di e instituto di mas importante di nos pais, ta moviendo diferente contactonan internacional riba nivel politico pa asina logra un solucion concreto. Otro miembronan di Parlamento tambe ta hasiendo esfuerzonan importante. Banda di e companianan ya conoci cu ta den e negociacion, tin otro companianan tambe cu ta mustra interes. Mi ta keda positivo, y esaki mester ta e postura di henter comunidad”.
“Mi por scucha un bay bin entre cierto politiconan ken a sere of ken a habrie, pero mi no ta kere ta e momento di hasi esaki! Trahadornan, sub-contratista, famianan y San Nicolas en particular, ta den un situacion di dolor y tenso, y e discusionnan aki no ta yuda. Tene poco fe cu nos lo sali hunto di e situacion aki”, ta mensahe di nos Presidente di Parlamento.
Gobierno a cuminsa implementa un plan di contingencia pa asina por “vang op” e trahadornan. Esaki mester wordo mira como algo temporal, pa yega na un solucion definitivo. Na comercio y inversionistanan ban continua cu e animo cu Arubianonan y henter nos comunidad ta conoci pe.
E refineria ta e prioridad di cada un di nos. E esfuerzonan banda di esunnan di Gobierno y tambe Parlamento, tambe ta wordo aprecia. Ban keda mas uni cu nunca y para banda di e trahadornan di e refineria.
