Si no firma CAO pa diabierna ABV su miembronan ta bay den accion

Publication: Thursday, 22 March 2012. Categoria: General

ORANJESTAD (AAN): Presidente di sindicato ABV, di trahadonan di Hospital, a splica cu ainda no a logra un CAO apesar pa e empleadonan apesar cu casi tres siman pasa ya caba a pone un fecha pa e firmamento tuma lugar. Den combersacion cu Gina Maduro, e ta bisa cu berdad ora cu el a worde entrevista ultimo biaha a pone e fecha cu lo firma dia 29 di februari. Pero a resulta cu e “kaderbrief” cu mester worde traha door di Gobierno y manda pa AZV, no ta completamente cla ainda.
Awe ta refleha nada di e periodo 2013 y 2014. E sindicato ABV, segun Maduro, kier logra un CAO di trinta luna y no uno cu ta limita na un aña pa evita e problemanan cu a surgi den e añanan tras di lomba. Sinembargo awor ta asina leu cu a programa un reunion pa tuma luga merdia entre Mediador, Hospital y e sindicato.
Hospital mes di su banda lo manda un carta pa Gobierno pa splica kico e “kader brief” mester contene, pa por yega na firma un CAO di trinta luna. Presidente di ABV ta bisa cu ayera den combersacion cu nan tabata tin cu esnan concerni, a pone basta presion pasobra no por keda rek e situacion aki, ya cu for di januari tin e trahadonan ta wardando riba finalisacion di e contracto colectivo nobo. Y e trahadonan berdad a cansa di warda y sindicato tambe ta harta di ta sinta cada rato na mesa mientras cu e “kader brief” no ta kedando cla manera mester ta.
Pesey pa ABV, diabierna awor ta e ultimatum. Si no tin un decision riba e kader brief y no tin firmamento, lo cuminsa cu accionnan. Nan tin un siman y mey cu no tin contacto cu gerencia, pero por a compronde for di Mediador cu e reunion ta hustamente pa finalisa cu e aspecto di kader brief pa por firma e CAO, de lo contrario nos ta bay den accion pasobra no por keda warda mas.

Leave a Reply