Supuesto caso di secuestro di dos mucha muher den pleno luz di dia na Playa

Publication: Tuesday, 13 March 2012. Categoria: General,Policial

Caso bao investigacion
ORANJESTAD (AAN): Dialuna atardi algo pasa di 3’or y mey di atardi a drenta informacion cu un van color blanco a pasa secuestra dos mucha den playa y bay direccion pariba. E muchanan a mantene contacto telefonico cu Polis y a keda comunica nan posicion pa cual a despacha Polis pa sigui tras di e van. Polis a busca e van den areanan di Barcadera, Mangel Halto, Pos Chikito y Savaneta pero no a topa cu dicho van. A listra preventivamente varios auto cu tabata klop cu e descripcion pero no a topa cu e muchanan.


Poco rato despues e muchanan a yama Polis back y bisa cu nan ta cu un tanta banda di oficina di ex ontvanger na Playa. Polis a cancela e buskeda mesora.

Un caso sigur masha straño riba un dialuna cu a bay particularmente trankil.
Segun informacion e dos damitanan uno di 13 y otro di 14 aña a bay cumpra carni pa e wela cu ta biba den area di Madiki. Na dado momento e van blanco cual su number lo ta caba cu 233 den e area di Consales a pusha ambos den e van y bandona e lugar.

Nan a core yama nan mayornan via nan celular. Esnan den e van a sinti cu nan ta den problema y mesora a habri e van back y pusha ambos damita benta pafor banda di Ex Ontvanger.

Polis a hiba ambos na recherche pa tuma nan declaracion. Famia tabata preocupa y a bay warda di polis pa topa cu ambos hoben. Despues recherche tambe a bay cu un di e damitanan back na e area banda di Consales pa asina e splica mas of menos kico a sosode.

Recherche kier a haya un bista riba e situacion. Esnan den e van tabata tin mal intencion cu e menornan aki pero nan intentonan a fracasa.

Mester remarca cu un di e hobennan envolvi algun dia pasa tabata den noticia caba ora famia a bati alarma cu e tabata perdi. Marduga el a yega cas y a resulta cu e tabata cu un amigo na San Nicolas y famia tabata preocupa na Playa.

Leave a Reply