Diario Online

E siman aki of muy pronto Petro China y Valero ta yega Aruba pa topa gobierno

Publication: Tuesday, 17 April 2012. Categoria: General

ORANJESTAD(AAN): Cu cos tabata keto relaciona cu e refineria tabata pa un motibo. Partidonan tabata tin mester di espacio y trankilidad pa asina por a deal na mesa pa keda cla cu benta y compra di e refineria. For di bon fuente ta hayando diferente informacion relaciona cu e refineria. Un di nan ta cu e siman aki mes of mas tarda otro siman ehecutivonan di Petro China y Valero ta yegando Aruba. Aki nan lo reuni cu gobierno di Aruba. E yegada di e grupo aki nifica tambe cu ta hopi cerca di un decision final relaciona cu compra di e refineria. E rumornan persistente ta bisa cu e otro weekend of proximo dos simannan mes Petro China lo anuncia na Aruba e posible deal cu Valero.

Esaki lo bira un noticia hopi positivo pa nos isla. E forma cu Valero ta atendiendo e situacion internamente na Aruba ta muestra cu nan intencion no ta pa manda e trahadornan cas. Si berdad cos tabata bayendo malo na mesa anto masha dia e trahadornan trahando directamente cu e refineria lo a ser manda cas. Ta reina un trankilidad den e refineria na Aruba.

Nos sa cu hopi di esnan cu ta traha cu contratistanan berdad a bai cas pasobra e contratonan a termina. No a sigui cu mas proyecto y pesey contratistanan mester a keda afor mientrastanto cu ta haciendo tur esfuerzo pa bende e refineria.

E dedicacion y trabaonan incansable di e dos mandatarionan Mike Eman y Mike de Meza ta dunando su fruto un biaha mas.

Dia y anochi nan a move shelo y tera tanto na Aruba como den exterior pa asina garantiza pan riba mesa pa cada tata y mama di famia cu ta bibando sea directamente of indirectamente di e refineria. Specificamente pa San San Nicolas y Aruba su economia, esaki lo nifica algo grandi.