Raport di WODC a bin pasobra MEP su gobernacion tabata hopi cuestionable

Publication: Wednesday, 18 April 2012. Categoria: General

ORANJESTAD (AAN): Den un di e reunionnan cu Parlamento a tene e siman aki a trata e raport di WODC cu ta uno masha importante, pasobra na momento cu e Gobierno nobo a sinta, a worde acerca door di Hulanda cu tabata preocupa. Preocupa pasobra pa basta tempo caba nan tabata trata di convence Gabinete Oduber pa haci investigacion rond di diferente tema cu a lanta pregunta serio riba integridad di Gobernantenan di Gabinete Oduber y a lanta hopi pregunta rond di procesonan encamina, proyectonan ehecuta pa favorece amigo di gobernantenan, etc.
Prome Minister Mike Eman entrevista riba esaki, a bisa cu loke a sosode den e periodo menciona, a crea un ambiente di masha hopi desconfianza, pa corupcion y fraude cu por a tuma luga durante e periodo di Gabinete Oduber. “E tabata hopi evidente caminda Prome Minister di e tempo ey tabata tin tur su diestres rumannan nombra den Gobierno, tin di nan tabata tin contractonan miyonario pa haci trabaonan, cu por a worde haci door di otronan.


Tabata tin otro Minister cu tur su edificionan tabata worde gehuur cerca su ruman, caminda nos ta papia cu na huur so Gobierno tabata gasta 20 miyon Florin pa aña. Tin otro caso caminda e mesun Minister di Husticia tabata duna su ruman miyones di Florin na casonan di Abogado, comosifuera no tabata tin otro Bufete di Abogado na Aruba. Asina tabata tin caso di Namdar, esun di Lotto cu awe ta den investigación.

Pues hopi pregunta riba integridad di tur e Ministernan cu a conduci na un rapport,” Eman a bisa. Eman a splica cu e no tin ningún problema cu e petición pa traha un rapport.

Hasta den pasado rapportnan a worde traha riba AVP, y semper a coopera, inclusive ora cu e casonan a bay Corte, caminda e personanan a sali liber. E mandatario ta kere cu tur gobernante mester por pone su mes na tipo di escrutinio asina.

Pero a constata for di e fraccion MEP cu nan no ta habri pa tipo di investigacionnan asina. Eman ta bisa cu tempo cu e tabata den oposicion, pa duda cu tabatin den e proceso hiba door di Ministerio Publico, caminda ta kere cu nan tabata bou di presion fuerte, a bisa pa laga husticia cana su caminda, ya cu solamente den un veredicto final di un Hues por demostra inocencia. Y si cosnan robez a sosode, lo tin condena.

Den e casonan di gobernacion di Oduber tabatin diferente temanan preocupante cu a sosode e tempo ey, di cual algun di nan ta den man di Ministerio Publico. Basa riba loke a investiga, ta aparece den e rapport tambe comentarionan general riba gobernacion y procesonan pa decisionnan worde tuma los for di influencia.

 Ta sugerí cambionan den otorgamento di vergunningnan, den tumamento di decision, destaho publico, tur pa reenforsa e institutonan y haci nan mas independiente. Gobierno, Eman a bisa, tin un lista largo pa presenta na Parlamento di cambionan cu a introduci caminda a cuminsa duna e función di mandatario y parlamentario integridad back.

Un di e ehempelnan aki ta e sistema di “overbruggingstoelage” cu a worde cambia. Pero tambe a menciona e “versoberingswet” caminda a cambia e condicionnan pa haya pensioen; no por “cash in” vakantie no tuma. Pues e propio Prome Minister por a cuminsa cobra su pensioen, banda di su salario, na momento cu el a haci 50 aña. Pero cu e versoberingswet, a cambia esaki pa awo y futuro.

Pues cambionan fundamental, caminda integridad y sirbi país ta bion na prome luga. Premier Eman ta kere cu e salario di Minister ta suficiente pa hiba un vida bon, y no mester un pensioen na banda, combina cu tur e otro beneficionan.

“Nos a demostra e comunidad, duna un señal cla, cu esaki pa nos ta importante. Haci sacrificio pa comunidad sa cu e mensahe cla cu nan a manda na september 2009, pa un gobernante honesto, cu no a bin pa duna trabao una diestres ruman, beneficio di rumannan, ta pertenece na pasado.

Tur e tipo di cosnan aki cu a sosode den pasado ta pone un mancha riba integridad di gobierno, pero tambe calidad di gobernación. E mandatario a señala cu Gobierno awor ta scucha institutonan, cu ta manda conseho, di kico mester worde haci. Pero tambe a yena tur e vacaturanan cu tabata existi den Ministerio Publico pa nan por funciona debidamente.

Hopi instituto cu durante ocho aña no a funciona, awor ta traha atrobe. E ta kere cu e “versoberingswet” a hunga un rol importante pa demostra cu servicio publico ta para na prome luga.

E rapport di WODC, según Premier Eman tas plica, ta enfoca riba e incidentenan cu a tuma luga durante e gobernación anterior, caminda prácticamente tur e ex Ministernan tin un lista largo di decisionnan tuma cu ta worde cuestiona. El a finalisa bisando cu tin basta ley cu mester worde introduci pa reenforsa e sistema di control y logra cu tin un bon sistema y balanza.

Leave a Reply