15 autobus di Arubus lo subi caminda pa reemplaza e busnan grandi riba e rutanan 5, 6, 7 y 8

Publication: Friday, 20 April 2012. Categoria: General

Chofernan di autobus por ta trankilo ya cu e decision aki no lo afecta nan operacion
ORANJESTAD (AAN): Minister Otmar Oduber a bin ta informando for di algun tempo caba e cambionan cu ta bay tuma lugar den Arubus, nos empresa di transporte publico, pa di e forma aki mehora no solamente su situacion financiero, pero tambe servicio na publico.
Den cuadro di e cambionan aki, a tuma e decision di busca no solamente 15 bus nobo, pero tambe 16 autobus tambe nobo, pa mehora e flota di busnan existente cu no ta den bon estado.


A tuma e decision cu pa e rutanan 5,6,7 y 8 lo elimina e uso di busnan grandi y na su lugar lo bin cu autobusnan, mirando cu e cantidad di pasahero pa cu e rutanan aki no ta hustifica e uso di busnan grandi, es decir, no tin suficiente pasahero pa haci uso di bus grandi. Estudionan a mustra cu e uso di busnan na e rutanan aki ta trece perdidanan pa Arubus y e cambio di vehiculonan lo por contribui na mehora e situacion financiero di e compania di transporte publico.

Asina entrante 1 di juli 2012, 15 autobus lo reemplaza e busnan na e rutanan 5,6,7 y 8. Banda di e rutanan aki e autobusnan aki lo yega na lugarnan mas aleha, caminda no tin transporte publico ta yega. E decision aki a bin a base di hopi peticion cu a drenta di personanan cu mester cana distancianan largo pa por haya transporte publico. Di e forma aki ta contribui tambe na mehoracion di servicio na comunidad.

E maneho nobo di Arubus na ningun momento lo perhudica e autobusnan, ya cu ta trata di rutanan existente caba y solamente lo reemplaza busnan pa autobusnan. Minister Oduber na ningun momento a ni pensa di perhudica chofernan di autobus, pa kendenan e tin hopi respet y aprecio mirando e trabao duro cu nan ta eherce tur dia.

E mandatario, kende na e momentonan aki ta den exterior buscando acuerdonan nobo pa mehoracion di transporte aereo y turismo, a indica cu e ta lamenta cu e chofernan di autobus a tuma e decision di bay den accion y manifesta dilanti Bestuurskantoor, siendo cu nan por a tuma e caminda di pidi un reunion cune y asina haya informacion directo y corecto.

E ta compronde nan preocupacion y a indica cu otro siman cu e ta na Aruba el lo reuni cu representante di e chofernan di autobus pa asina splica nan detayadamente e cambionan cu ta bay tuma lugar den Arubus, incluyendo e situacion di e 15 autobusnan cu lo subi caminda entrante 1 di juli.

“Mi sa cu nan ta preocupa, tin hopi mal informacion coriendo rond cu lo tin 31 bus den total lo subi caminda y cu esaki lo perhudica e autobusnan, pero esaki na ningun momento lo ta e caso.

Tin 15 bus nobo na caminda pa reforza e flota di Arubus, mirando e situacion den cual e busnan actual ta, y lo bin 16 autobus, cual un di nan lo keda como reserva. 15 autobus lo reemplaza e busnan grandi riba e rutanan 5,6, 7 y 8 pa haci e servicio uno mas eficiente y mihor y nan lo yega tambe na lugarnan caminda na e momentonan aki no tin transporte publico ta yega”.

Minister Oduber a bisa tambe cu asina e yega Aruba e lo reuni cu e representante di e chofernan di autobus pa scucha nan preocupacionnan, splicanan e situacion corecto y asina yega na palabracionnan cu ta na beneficio di tur hende.

Leave a Reply