APA tin e meta di cera alianzanan estrategico cu por trece un balor agrega na nos waf

Publication: Tuesday, 24 April 2012. Categoria: General

Director Alfonso Boekhoudt:
ORANJESTAD (AAN) – DIARIO a realiza un entrevista cu drs. Alfonso Boekhoudt, director di Aruba Port Authority (APA) relaciona cu un bishita cu for di exterior for un compania portuario for di Brasil. Señor Alfonso Boekhoudt a señala cu APA tin contactonan cu diferente compania for di exterior, entre otro di Sudamerica manera Colombia y Brasil, indicando cu nan no ta enfoca riba un pais pero riba alianzanan estrategico cu por ta beneficioso pa nos pais y cu tin un balor agrega pa e volumen di waf. Boekhoudt a indica cu ta facil pa por haya partnernan haci negoshi, actualmente, di e volumen cu nos waf tin pero APA tin companianan cu ta haci esaki caba.
Loke mas ta interesa APA awor ta wak unda por yega na alianzanan estrategico cu ta trece un balor agrega pa APA, tanto directo como indirectamente y si ta logra establece companianan hunto cu por haci uso di iniciativanan, manera “Caribbean Basin Initiative”, LGO Besluit y cu por fungi como intermediario pa negoshinan mas grandi. Panama tambe ta un Puerto di interesa pa APA, y den luna di Juni sr. Boekhoudt lo ta bayendo Panama y aya tambe e lo haci su contactonan pa wak con por ta posible pa yega na e alianzanan estrategico aki cu ta bay ta di balor grandi pa Aruba.

Señor Boekhoudt a duna di conoce cu el a ricibi bishita di e director di FIESTP, señor Jorge Muller. E proposito di su bishita tabata pa papia cu diferente personanan y cu ATIA, naturalmente, pa duna siguimento na e mision pa Brasil cu Aruba tabata tin.

El a splica cu un bez cu contactonan ta worde estableci, busca informacion y cuminza den un comunicacion cu companianan na Brasil, ta importante pa sa con e canalnan ta habri, kico mester logra pa cuminza habri portanan y yega na cosnan concreto cu por haci hunto y esaki ta e meta pa realmente haya sa con tin cu sigui cu e contactonan cu tin pa habri e portanan y comberti e posibilidadnan existente den algo concreto y realistico cu tur hende ta wak cu e ta tuma lugar.
Di parti di comercio di Aruba tabata tin sesionnan masha importante pa worde teni, particularmente pa director y APA mes y e contactonan cu el a establece na Brasil.

El a señala cu Brasil ta interesante y importante pa APA den hopi sentido, y nan kier logra tin e contactonan aki y cera e “join venture” pa acuerdonan mutuo y negoshinan conhunto cu diferente compania na Brasil, y si e acuerdonan lo worde cera pa haci negoshinan halto cu lo pasa via Aruba, no solamente pa Aruba mes pero sino di Aruba via Caribbean Basin pa Merca y via LGO drenta Europa, y esey ta bay genera volumen cu tambe ta pasa via nos waf.

Director di APA a indica cu di otro banda, e aspecto directo ta nan a logra establece contactonan cu companianan cu ta mira e ubicacion geografico di Aruba como algo estrategico pa sigui haci un analisis con pa uza esaki pa realiza un mehor linea logistico den e region, y den e sentido aki APA kier sigui tin e reunionnan aki, duna siguimento, manera aworaki a sosode cu e bishita di señor Muller di FIESP.

Leave a Reply