Diario Online

Atrobe e mentalidad di MEP

Publication: Saturday, 21 April 2012. Categoria: General,Politica

Analisis politico
Un di e sospechoso nan den e caso di Lotto pa Deporte e siman aki a worde aresta pa sigui cu e investigacion cu ta andando pa casi dos aña. Ora mira e persona aki bay na man di polis hende por kere cu berdad e mentalidad di hende corupto a penetra den e famia ey cu no tin ningun sinti di hende normal mas. Hopi placa pero hopi placa mes di Lotto pa deporte a bay den man di famia cu contrato nan falso. E escandalo di Lotto pa Deporte ta bay resulta hopi mas grandi cu hende ta kere awo pasobra no ta por nada cu Ramon Lee a worde forza pa firma cu e a ordena e bagamunderia cu a tuma luga. Ta con por ta cu un ex ministro ta willing pa firma cu e ta culpabel na e iregularidad nan cu a tuma luga na Lotto pa Deporte. Ta con por ta posibel cu un ministro cu probablemente no tin un idea kico a sosode di berdad ta mara su mes cu hasta e por bay cera.

Pasobra ora bay resulta cu esnan directamente envolvi a comete crimennan grandi e ex ministro ta bay worde poni responsabel. Mescos cu e casonan di Booshi Wever cu ta haci e cosnan mas straño pasobra e doñonan di MEP tin suficiente material ariba dje cu e no tin un propio kier mas e ex ministro Lee tambe a worde forza di firma algo cu nunca e lo firma si no tabatin forzanan mas grandi cu a exigi pa e purba di yuda e primonan sali for di nan precancia.

Ta mustra tambe cu mester a warde te ora cu e procurador general anterior bay for di Aruba cu e investigacion di e caso aki por a sigui. Tur cu conoce esnan envolvi den e caso di Lotto pa Deporte ta convenci cu no ta e muchanan ta esnan cu a pensa e manipulacion cu placanan grandi pero cu tin celebronan mas rafina cu a guia henter e fluho di miyones.

Ta pesey tambe e caso a worde tranca continuamente. Awo cu e caso aki casi no por worde para mas y trabao worde haci manera mester ta lo bay sali na cla con putri e mentenan di e hendenan di MEP ta. Nos no mester lubida cu ta trata aki di famianan directo di e top di partido y cu a worde compaña directamente den henter e asunto di Lotto pa Deporte.

Nan a scapa te awo pasobra no tabatin un sistema di ministerio publico cu kier a yega na e cabezantenan di MEP. Awo si landsrecherche haci su trabao manera mester ta nos ta bay mira e grandinan di MEP worde interoga pasobra no tin duda cu e placanan grandi cu a bay den e corant, radio y television di MEP a bay cu placanan cu dificilmente por worde splica sin cu e mas grandianan ta cay aden.

Pa Aruba ta absolutamente necesario cu tur esnan cu tabata roba placa di nos pueblo pa 8 aña largo worde poni responsabel pa loke nan a haci. Semper nos a enfatiza cu e partido MEP ta un grupo di hende cu ta “brothers in crime”.

Nan tabata hunto pasobra cohuntamente nan por a horta sumanan gigantesco y un tabata tapa pa otro. Awo cu nan ta kibrando for di otro casi tur dia nos ta tende nan acusa otro di a comete corupcion na grandi. Awo cu nan no por horta nada mas e rabia cu nan tin ariba otro ta mustra kico nan mentalidad ta di berdad. Ora mira e ex hefe di Lotto pa Deporte actua mientras polis ta hibe pa bay interoga e mentalidad di hende troci ta grita pa hende wak.

E actuacion di e hoben aki ta confirma cu e ta convenci cu den su grupo e ta worde considera como un heroe cu ta actua manera mester ta. Hendenan drechi cu lo mester pasa den un aresto asina lo muri di berguenza hasta si e ta completamente inocente.

Ta pasobra nan tin e mentalidad di criminal un hoben por actua manera e a actua y por papia manera e a papia den pasado. Ora nos yega mas leu den e caso aki y sali afo con culpabel probablemente e persona aki ta nos kier mira y tende su reaccion y esnan rond di dje cu a goza hunto cune.